محمد سقراط-كود///
واحد الخبر هاد اليوماين ديال عريضة ضد التدريس باللغة الفرنسية، من العنوان كيبان مطلب ثوري وعاقل بحكم المستقبل والحاضر راه بالإنجليزية، وخصوصا هاد جيل الإنترنيت راه كيتواصل غير بلونكلي الفرونسي مموكلاش الخبز وحزق عليها الركب، ولكن فاش دخلت قريت المادة لقيت أنهم كيطالبوا ترجع الدراسة بالعربية، بنادم مصر على أنه يبقى في آخر الصف ديال البشرية، العربية راه تمشي دابا لقريش وماتلقاش لي يهدر معاك بيها أغلبهم كيهدر بلونكلي ومبلي بالثقافة الأمريكية السائدة، البلاد لي تلقى فيها شي حد كيهدر الفصحى بحال الى خارج من فيلم الرسالة هي موريتانيا وراه باقا أصلا في عهد الرسالة يالله تزادها شوية ديال الطوب والحجر وشي وتيد وأومو وكوكا كانيط راه كيسيفطها ليهم المغرب.
أي واحد عاقل شاف المأساة لي وقعات للجيل ديالنا والجيل لي قبل لي قراو بالعربية لي هيآتهم يستقبلوا الصحوة الإسلامية والأفكار المطرفة بالأحضان حيت اللغة الوحيدة لي عندهم هي العربية لغة المشرق لي منو كتجي كاع الأمراض والآفات الإجتماعية لي كيعاني منها المغرب سابقا وحتى لدابا، حتى حاجة زينة مكتجينا من الشرق، الخير كيجينا من البحر وفيه كيمشي خيرنا، الموشكيل ديال العربية ماشي لغة غير قابلة للتطور ولكن لغة بحمولة دينية كتشد اللغة وكتشد معاها كتب الفقه وإبن تيمية والحلال والحرام وداك الخبير ديال أمجاد الماضي والأندلس لنا، ولغة العلم والأدب والإبتكار كتولي تبان ليك لغة الصليبيين، وأنك حسن منهم غير حيت مسلم وهوما واخا عندهم الدنيا حنا عندنا الآخرة، حتى كتوعى شي نهار بلي حنا لا دنيا لا آخرة غير سير هكاك.
أنا كواحد عندو غير العربية راه كنحس براسي زيزون وعمى وصمك والحياة كتبان ليا مغبشة حيت كنشوفها بلغة وحدة، مثلا أغلب الأفلام لي كنتفرج بسوتيتراج بالعربية هوما ترجمة غير دقيقة وفيها بزاف ديال عقلية حلال وحرام وعيب وحشومة، وفي الوقت لي الدراري لي عندهم لونكلي كيتفرجوا هاوس أوف ذا دراكون يالله كيتحط، أنا خاصني نتسنى حتى يسالي شي عراقي من شي حسينية أو من شي عرس ديال العطواني ويتفضل يترجموا ويبدى يكتب ليا مشهد جنسي قادم بعد تلاتين تانية في كل جزء من الفيلم، اذن راه كنستهلك غير الخيال ديال الحاجة ماشي الأصل ديالها، المستقبل ديال لونكلي هادي مابقى كيناقش فيها حتى واحد خاص الدولة وأصحاب القرار يوعاو بيها وصافي، راه الدول الفقيرة ولي كتدير شي إقلاعة إقتصادية في الغالب كتلقاها أنكلوفون، لونكلي بيها غادي تواصل مع الهند والشناوا ها نص كوكب الأرض، وبيها تقدر تدور العالم وتواصلب معاه وهادشي لي متعطيه ليك حتى لغة أخرى، بالإظافة إلى أنها لغة الأنترنيت وهادي فقط كافية، العربية لغة الجامع وخاص تبقى فيه.