نجوى المالحي-كود//
من بعد لطيفة رأفت وبزاف ديال الفنانين الاخيرن، خرج سعيد الصنهاجي، حتى هو باش يعلق على الدعم ديال وزارة الثقافة لي استافدو منو بعض الفنانين في المغرب، وقال في فيديو على يوتوب: “الدعم ما عندي ما ندير بيه والا قلت ليكم بغيتو غادي نكون كنكذب عليكم، 40 عام وأنا خدام، ومسافر من بلاد لبلاد من أجل الأغنية المغربية الشعبية وكنفرح الناس وهادشي باش عايش”.
وقال الصنهاجي في الفيديو لي بكا فيه گاع: “كنهضر بحال لي هضرات الفنانة الكبيرة لطيفة رأفت، غادي نهضر على الموسيقيين لي كيموتو في المغرب، عطاو للفن، وكيموتو، دخلو شوفو الأسماء لمن تعطا الدعم، لأنه الدعم تعطا للي لباس عليه وعندو الفلوس والفقير ليه الله، ما عندو باش يوكل ولادو”.
الصنهاجي قال أن أغانيه من 1999 وباقة كتتغنى في العراسات وكيطلبوها الناس في الحفلات، ورغم هادشي هو ماشي بحاجة لهاد الدعم، ولكن بغا يهضر على الفئة لي ما تقدرش تهضر على راسها.