وكالات //

نايضة في جامعة ليڤربول البريطانية بعدما لقاو عدد من الطلبة، حوالي 1500 واحد، فـ المعدلات ديالهم زيرو (0) لأن الأساتذة و الطاقم التربوي كانو في إضراب، احتجاجا على تسريح بعض الموظفين، ورفضو يدخلو النقاط ديال الطلبة في السيستيم، و بالتالي تسجل لهاد الطلبة زيرو فـ النقط ديالهم.

الدراري والدريات قراو ودوزو الإمتحانات وكلشي كان بيخير لكن مع الإضراب وداكشي اللي وقع من بعد، خداو زيرو للواحد وصدمتهم كانت كبيرة وكعاو بزاف، خصوصا الطلبة اللي كان ناوين يتخرجو هاد العام.

الطلبة قالو أن هادشي اللي وقع كايهدد مسارهم المهني خصوصا ملي يبغيو يخدمو ولا يكملو قرايتهم في مدارس عليا أخرى.

وفي حالة كمل الإضراب، يقدرو الطلبة يلقاو شي حل و ياخذو نقطهم الحقيقية اللي كايستاحقوها، ولكن هادشي غايكون صعيب خصوصا وأنهم غادي يضيعو وقت طويل وهوما كايتسناو، كيف قالت جريدة ” ديلي ميل” البريطانية.

وقالت طالبة علم النفس، آبي أوكَيني، أنها كانت كاتتوقع تجيب نقطة مزيانة،و لكنها فالأخير تصدمات بالزيرو.