أسود الفوتسال: هدفنا الاول بالتأهل للمونديال حققناه ودابا مركزين على فينال كوب دافريك
سهام البارودي – كود//
من بين القرارات لي خديت هاد العام هوا انه ننقص من المشيان لمراكش فحال كريستيانو رونالدو و نبدا نزور و نشجع الزيارة ديال مناطق اخرى فالمغرب لي كانشوفها احسن بكثير من مراكش ! و اول هاد المناطق هي فاس و النواحي لثلاتة ديال الاسباب رئيسية :
السبب الأول هوا فاس و النواحي ديالها فيهم بزاف مايتشاف و فوقت قصير و مسافات قريبة، يمكن فنهار واحد مثلا دير ايفران ازرو ايموزار فاس ! و نهار آخور دير صفرو و ترجع لمولاي يعقوب تكمد فيه عظامك ! يمكن قبل ماتوصل لفاس تمشي لمكناس تفطر فالحاجب و لا بوفكران و تتمتع بالمناظر الطبيعية الموجودة فالمنطقة و تاكل ماكلة نقية ! فاس بوحدها راه فيها بزاف مايتشاف ولكن طبعا و نتا حاضي بزطامك و حاضي جنابك حيت للاسف فاس زوينة فالمعيشة و لكن مقودة عليها من ناحية الأمن!
السبب الثاني هوا الناس ديال المنطقة لي كاتحس بيهم فعلا محتاجين شي حد يعاونهم و محتاجين للسياحة باش يحركو عجلة الاقتصاد فوحدة من المناطق الغنية فلاحية و لكن الفقيرة من ناحية الاستثمارات ! الى فطرتي فقهوة فبوفكران ماشي فحال لاكليتي فماكدو ديال گيليز ! القهوة فبوفكران راه كاتعطيك فرصة انك تجرب منتوجات مجالية ديال المنطقة و فلوسها كايمشيو ميا فلميا للمنطقة ! حتى السعاية مثلا فدوك المناطق واخا قلال كاتحس بيهم فعلا محتاجين لي يصوڤيهم حيت لاكنتي سعاي فبوفكران مثلا و لا ازرو ! راك فعلا سعاي د بصح ماشي سعاي فكازا و لا مراكش شلاهبي عندو دار فيها ربعة طاج و كايسعى كنوع من المتعة ! لا ! تما بنادم فعلا مقودة عليه و بزاف ديال المرات ماعندو حتى شي بديل آخر !
السبب الثالت هوا التعامل ديال الناس و الاثمنة المناسبة ! ايه حقا ماكاينش لوطيلات ديال مراكش و المنتجعات ديال مراكش و لكن كاين التعامل المزيان و كاين الاثمنة المناسبة ! بازار فآزرو كاتمشي تشري من عندو ماكاتحسش بيه باغي يهبط ليك السروال بالعكس كاتحس بيه كايشجعك باش تتقدى من عندو ! ماكايناش ديك تانصابت لي للاسف كانلقاوها فبعض البياعة و الشراية فمراكش لي كايبغيو يبيعو ليك براد ديال لينوكس صغير بربعالاف ديال !و يحسبو عليك طاجين فيه شنتيفة د اللحم بستالاف!
ثلاتة ديال الاسباب : الامكانيات ديال المنطقة و الحاجة ديال الناس للسياحة و التعامل و الاثمنة المناسبة بالنسبة ليا اسباب كافية باش فاس افران و المناطق التابعة ليهم يكونو وجهات سياحية مهمة للناس د الداخل و الخارج و يتم الترويج ليهم من طرف وزارة السياحة ! باش يخفاف حتى الضغط على الوجهات التقليدية فحال مراكش اگادير و خصوصا مراكش لي انا شخصيا كاتجيني اوڤر رايتد وبجهد! علاش ؟ حيت بزاف ديال المشاهير و اللعابة د الكورة و الرؤساء شاريين فيها القصورا و لوطيلات !
و من بعد ؟ شنو فيها مايتشاف ؟ علاش عليها هاد الزخم كولو ؟ واش ماكاينش بلايص فالمغرب يستاهلو انه المغربي يخسر فيهم فلوسو بلا مايحس براسو تنصب عليه من شي مول طاكسي و لا اوطيل و لا ريسطو ؟
اكيد كاينين غير الترويج ليهم لي ماكاينش !