على المواطن الجزائري أن يستفيد من خريطة المغرب! إذا فشلت في حياتك. أو في الحب. أو في أي امتحان. أو أصبت بكسر. أو بالتواء في الكاحل. فقل السبب هو خريطة المغرب
عفراء علوي محمدي- كود//
تقريبا جمبع حالات الإصابة بفيروس كورونا المستجد اللي تسجلات فالسيمانة اللي فات فالشينوا، وتحديدا فالعاصمة بيكين، كلها مرتبطة بسوق الجملة شينفادي، بحيث قالت وسائل إعلامية حكومية بللي تم اكتشاف الفيروس فالبلاص فين كيقطعو السومون فهذ السوق.
الخميس اللي فات تسجلات أول إصابة بالفيروس من بعد 57 يوم بدون تسجيل إصابات، نهار الجمعة تم الإعلان على إصابة 150 واحد، كيشتركو فأنهم كاملين مشاو لهذ سوق الجملة اللي كيبيع 80 فالمية من اللحوم والخضرة اللي كتستهلك فالشينوا، وكَاع ما فيه لحوم الحيوانات البرية، وبالتالي الناس شكو واش يكون من السومون جا كورونا.
وبناء على هذ الأخبار اللي راجت بشكل كبير وخلعات الناس، المحلات حيدو هذ الحوت والواردات ديالو من أوروبا توقفات، لكن مركز مكافحة الأمراض قال بللي من المستبعد يكون السومون حامل للفيروس، وقال تشنكَ كَونكَ، عالم الفيروسات في جامعة تسينكَهوا، فتصريحات لقناة تلفزيونية صينية: “كتشير جميع الأدلة المعروفة، حتى لدابة، على أن هذا النوع من المستقبلات موجود فقط فالثدييات، وماشي فالحوت”.
وقال المتحدث باسم لجنة الصحة البلدية بللي 40 عينة من السوق ديال الألواح تدار ليها طيسط كورونا وخرجات نتائجها إيجابية، ودارت بدورها هونكَ كونكَ التيست ل16 عينة دالسومون المستورد من دول الشيلي وإيسلاندا والدنمارك باش تعرف واش فيها كورونا، وكلها خرجات سلبية.
والشينوا كتستورد ما يقارب 80 ألف طن من السومون من دول مختلفة كل عام.