مصطفى الشاذلي – كود سبور//

جمال السلامي، مدرب الرجاء البيضاوي وقع في المحظور، بعد تصريح هاوي قصف فيه الوداد البيضاوي بلا ما يكون في حاجة إلى ذلك.

السلامي رجع حديث مختلف التواصل الاجتماعي، بعد تصريح گال فيه، إنه طلب من لاعبي الرجاء البيضاوي عدم استفزاز لاعبي الوداد بعد إقصائهم اللي فيهم يكفيهم.

“اللي فيهم يكفيهم” هاد العبارة هي لي غادي تجرو للجنة الأخلاقيات بكل تأكيد، لأنها مستفزة وكتحرض على العنف والشغب، وهنا مربض الفرس.

كيفاش، لحقاش وزارة الداخلية وضعات قوانين صارمة لمحاربة هاد الظاهرة وإنزال عقوبات تصل إلى السجن ضد مرتكبي الشغب أو المحرضين عليه.

قصد أو ما قصدش، السلامي هاد المدرب اللي حقق نتائج مع الرجاء البيضاوي منذ تعيينه، ريب كلشي، إذ ممكن توقيفه إلا بان للجنة الأخلاقيات أنه متورط في استفزاز الوداد بعبارة محرضة على الشغب وما شي بعيد يمشي الملف النيابة العامة باش تگول كلمتها.

وربما هاد الشي غادي يستغلو الوداد البيضاء من أجل التصعيد ضد غريمه الرجاء البيضاوي ومدربه السلامي، لانه غادي يدافع على سمعتو وتاريخو، خصوصا الا دخل جمهورو على الخط. وفكها دابا السي السلامي.