كود الدوحة ///

كلشي كان غادي مزيان حتى خرج خبر فعمقو مزيان ولكن قودها على كلشي. الخبر هو انو بطلب من الجامعة الملكية لكرة القدم عطات الفيفا 5 الاف تذكرة للجمهور المغربي. كان كلشي مزيان. المفروض هاد الشي يتوزع على الالتراس او يتباع بثمن معقول باش كلشي يدوز منظم. حاجة الفابور ديما كدير المشاكل. مشى بودريقة محمد عضو المكتب الجامعي يفرق الفي تذكرة من اصل هاديك 5 الاف بمكتب المعارض اللي كاين بالخليج الغربي بالدوحة. ناضت الروينة بزاف. هاد المركز لكبير قريب ليه الفندق اللي فيه المنتخب.

شي واحد بقى كيتسنى قدام لوطيل اللي المنتخب . ناض مدرب الاسود وليد الرگراگي خرج من لوطيل وعطى لهاد الشخص بيي. تصور داك الشي. ولى مشكلة كبيرة. كلشي جا حدا لوطيل بغى حتى هو بيي.

دابا الركراكي مهمتو هو يبعد الضغط على اللعابة. ما يخلي حد يقرب للوطيل. غدا ماتش مهم بزاف. محتاجين للتركيز للهدوء هاد الليلة قبل من مواجهة الصبليون غدا فالثمن. هاد التصرف غبي وطايش من مدرب ذكي بزاف وعارف اش باغي.

الجامعة دارت مشكلة بهاد التصرف ديال توزيع التذاكر. ولات مشكلة امنية. جاو عدد كبير من الامنيين باش يبعدو لمغاربة عن المركز. دابا مشاو لمسرح كاطارا فالدوحة باش يوزعو الباقي. الامن القطري هو اللي ولى مكلف.

هادا مشكل امني تسبب فيه توزيع التذاكر فابور وتصرف الركراكي مجاني وما عندو معنى. حتى لو بغى يعطي التذكرة لهاد الشخص كان يكلف شي حد يعطيها ليه حسي مسي.

علاش باش يكون عندنا منتخب مزيان ونكونو غاديين مزيان كنديرو تصرفات مجانية كتشوش وصافي. دابا خاص المنتخب يبدل لوطيل ديالو ايلى ربح ماتش غدا. وقبل هاد الماتش خاص يخرج هاد الليلة على خير.