كود سبور//

تحدث الناخب الوطني وليد الركراكي على حادث العنصرية اللي تعرض له المنتخب الوطني المغربي بفندق الإقامة ديالو بالعاصمة الإسبانية مدريد، من طرف شي واحد خدام تما، وأكد بلي ما كاين لاش يتم تكبير الموضوع حيث المغاربة متسامحين.

وقال وليد الركراكي خلال الندوة الصحافية اللي كتسبق ماتش المنتخب الوطني المغربي والبيرو: “عرفنا أن الولد اللي قام بالسلوك مازال صغير يمكن عندو 19 عام، اه ما غنتقبلوش هاد الشي اللي دار، ولكن حنا مسلمين وبغينا نبينو الناس بلي الإسلام كيقول لينا اننا خاصنا نسامحو والولد باقي صغير ما غادشي نحكمو عليه ونذبحوه، هو غلط درنا حنا شكاية عند البوليس والله يسامح الولد راه شهر رمضان هذا وخاصنا نبينو كيفاش حنا المغاربة والمسلمين كنسامحو”.

وكمل وليد الركراكي وقال: “اه العنصرية ما غاديش نقبلوها ولكن واحد الولد ما عمرو خرج من بلادو ما كايعرفش الإسلام ما كيعرفش العرب حنا دابا خاصنا نوريهم بالسلوك ديالنا والتسامح شنو هو الاسلام راه اعتذر والله يسامح وحتى هو عندو حياة ومستقبل دار غلط وطلب المساحة وراه كاين القانون وانا بالنيابة على المنتخب وكمغربي كنقول ما وقع والو وإلى بغى يجي يشوف المغاربة والمسلمين وكيفاش كيدوزو رمضان مرحبا به والله يسامح”.