كود سبور//

أكد الناخب الوطني وليد الركراكي بلي منتخب إسبانيا هو اللي كيبقى مرشح باش يربح الماتش ديال ثمن نهائي كأس العالم قطر 2022، ضد المنتخب المغربي، ويتأهل لربع النهائي، وأن اسبانيا منتخب كبير وعندو مدرب ولعابا كبار، واخا المغرب غادي يدخل باش يكرر إنجاز 2018، ملي دار ماتش كبير وقدر يفرض التعادل 2 مقابل 2 على لاروخا.

وتكلم وليد الركراكي على منتخب إسبانيا وقال: “غادي نلعبو مع واحد من أحسن المنتخبات فالعالم، من الناحية التقنية راه عندهم فرقة كتبغي سير اللعب وتستحوذ على الكرة، وهي فرقة ما تقدرش توقفها عمليا فالتيران، وعندهم طموحات من قبل ما يبدا كأس العالم، وعندهم مدرب كبير ولعابا واعرين ومتعودين على فحال هاد النوع من البطولات”.

وكمل الركراكي كلامو وقال بلي المنتخب غادي يلعب الكرة اللي كيعرف حسب الإمكانيات ديالو ولكن رآه اسبانيا كتبقى هي اللي مرشحة تربح: “غادي ندخلو هاد الماتش بالإمكانيات ديالنا وبلا نواقص، وراه غادي نكونو غلطنا أكبر غلط إلى دخلنا الماتش بشي مركب نقص فبالنا، راه فمونديال 2018 أكد المنتخب ديالنا بلي نقدرو نافسوهم، ودابا من بعدما دازت 4 سنين ما بقاتش عندهم نفس الفرقة وحتى حنا ما بقاتش عندنا نفس الفرقة نتمناو نكررو إنجاز 2018، والهدف هو نتأهلو بأي طريقة وغادي نحاولو نلقاو التركيبة المناسبة باش نهددو هاد الفريق الإسباني ولكن على الورق وبكل صراحة هما اللي فافوري ومرشحين باش يربحو”.