كود الرباط//

كشف شهود عيان لـ”كود” أن محمد اليعقوبي، والي جهة الرباط سلا القنيطرة، فاش صلى البارح بمسجد شعبي في ديور الجامع بالرباط، جاو ناس كيسلمو عليه وبلغو ليه بلي فرحانين بالمجيء ديالو باش يخدم العاصمة لي كتعاني من عدة مشاكل خصوصا ف قطاع التعمير.

وحسب مصادر عاينت حضور الوالي اليعقوبي، فإن المشهد دار استنفار فالسلطات، حيث أن الوالي ديما كايدير مفاجآت في زياراتو ولي مكاتكونش منتظرة، داكشي لي كيخلي كاع المسؤولين كيترعدو تحسبا لأي محاسبة بسبب بعض الاختلالات لي كاينا فالتعمير خصوصا احتلال الملك العمومي لي سبق “كود” نشرات عليه اخبار.

وحسب شهود عيان لـ”كود” فإن “ناس فديور جامع باغين من الوالي يزيد يزير السمطة على كاع المسؤولين لي مكيديروش خدمتهم ويحارب الموظفين الاشباح باش تكون الادارة في صالح المواطنين”.

وحسب مصادر “كود” فإن حي أكدال باقي كيعيش فوضى ف تدبير عدد من الملفات، سواء المتعلقة بالتعمير أو فيما يخص احتلال الملك العمومي خصوصا في ظل ما تسميه مصادر “كود” بـ”تواطؤ بعض أعوان السلطة مع بعض المستثمرين”.