محمد سقراط كود ////
جوج قطرات ديال الشتا كانو كافيين باش يوقفوا حركة المرور في عدة مقاطع طرقية و يسبوا فحوادث ، بحال حادثة الكار لي تقلب حدا مراكش ولي مات فيه رضيع ، وعدة طرق رابت أو جرفاتها السيول وعمرات حفاري ، وأحياء غرقات بالما ، هاد جوج قطرات بحال كل عام كيفكرونا بلي أننا باقين بلاد على قد الحال والبنية التحتية ديالها دغية كتفرش ملي كيجي الخير ماشي قد النفع ، وطبعا المغاربة كيوليو يرددو بشكل جماعي غير عقلاني فيناهي الدولة ، آش هاد الدولة ، مكاين غير الشفارة كلاو البلاد.
ولكن شكون هاد الدولة ، واش شي كائن مستقل علينا مكون من شي حاجة خرى من غير المغاربة وهو لي كيسير أمورنا ولحد الآن حسب العديد من المغاربة راه فشل فيها ، راه الدولة هي حنا والفساد لي فالدولة هو فسادنا كمغاربة ، هادوك الطرقان لي تصايبو مغشوشين وغير صبات عليهم الشتا رابو ، راه صاوبوهم مغاربة ماشي الكائن الهلامي المسمى الدولة ، كولشي غش فيهم من العطاش حتى للطاشرون حتى لمسؤول لي دوز المارشي ، كذلك هادوك القناطر ، وحتى الكسايد لي طراو كيتجي تشوف كتلقى العامل البشري جزء أساسي منهم ، واش أعباد الله سيفور ديال كار كيشول الواد حامل دايز من فوق القنطرة وداخل بخمسين روح مغامر بيها باش يدوز ويوصل فالوقت ويلقط البلايص، وهادوك الركاب لي فيه لي ماينوضوش ويحبسوه وهوما مريحين كيشوفوه داخل وسط الواد، واش خمسين واحد غلبهم شيفور ، واش كان مختاطفهم ، وفاللخر كتسمع آش هاد الكارثة آش هاد البلاد مكاين قناطر مكاين طرقان .
حقا جزء من هاد الهدرة فيه الصح ولكن شكون لي غادي يبني هاد الطرقان وهاد البنية التحتية ، مادام ان بزاف فاسدين أو متواطئين مع الفساد ولو بالصمت ، راه الدولة هي حنا ، وفسادها هو فسادنا، وهادشي لي كنعيشو فيه وهاد التقهقر لي كنعانيو منو صنيعة ديالنا حنا ، الفساد مستشري فالسلوكات اليومية ديالنا ، والغش والسرقة والنهب ومحاولة الإغتناء بأي طريقة راه ولات بحال شي عقيدة مشتركة بين بزاف ديال المغاربة ، وفاللخر كنوضو نغوتوا على الدولة تدير تفعل تبني تقاد ، ونبداو نتباكاو على كروش الحرام والفاسدين ، راه ماشي بالضرورة الفاسدين هوما ناهبي المال العام فقط ، بل أي واحد كيغش فخدمتو وكيغش حتى فدورو كمواطن راه فاسد .
