إيلا كذب عليك عرفي راكي خايبة.. دراسة: الدراري مكيكذبوش مللي كي كونو يهضرو مع بنت زوينة
كود هناء ابو علي ///
الدولة ماشي الحكومة كتعطي دعم للصحف. دعم فيه نقاش كبير حقاش مشى للحيتان لكبيرة. دعم كان خاصو يتوقف بالصيغة الحالية لانو غير مضيعة للفلوس وصافي. لكن هاد الدولة نفسها باش كيجيو لخبار كتعطيها ل”جون افريك”.
لخبار اللخرة هي ديال التعديل الحكومي المرتقب واللي من المتوقع يطير وزير العدل عبد اللطيف وهبي ووزير التعليم العالي عبد اللطيف الميراوي. هادي نشراتها “جون افريك”. طريقة كتابة هاد لخبار كتوري منين خارجة وشكون عطاها. ما عندها علاقة بالحكومة. بحالها بحال سفر الملك محمد السادس لفرانسا بعد خطاب العرش باش يكون حدا ماماه لمريضة. نشراتو نفس الاسبوعية الفرنسية اللي كنعرفو مدير تحريرها فرانسوا سودان صاحب شكون ومع من كيتعامل. راه لا علاقة له بشي سياسي فالحكومة او غيرها. عندو غير صاحب واحد كيتلاقى بيه ويتعامل معاه بشكل مباشر وغير مباشر.
دابا خبار التعديل الحكومي يقدر يكون صحيح ويقدر يكون غير بالون اختيار من نفس الجهة. لكن اللي فشي شكل هو التفاصيل. سفر رئيس الحكومة وسفر مستشار الملك فؤاد عالي الهمة لفرانسا واجتماعهم بالملك محمد السادس. هادا هو المهم بزاف.
دابا هاد الدولة اللي ما مآمناش بصحافتها علاش كتعطيها هاد الدعم لكبير. خلصات صحافييها =الصحافة المكتوبة= 9 اشهر وعطات لشركات التوزيع اللي ما توزع حتى زفتة وشركات الطباعة لملاير. علاش تعطي هاد الدعم كولو ايلى كانت كتعطي لخبار للبراني. للفرانسيس لمجلة ماليها توانسة. طبعا حتى حد فهاديك المجلة ما غادي يحتارم هاداك اللي كيعطي خبار بلادو وخبار مليكو لليهم وعندو صحف وجرائد.
باش دار تقرير هيومان رايت سب صحف مغربية وكال ليها اتهامات. يعني كلات لعصا حقاش دافعات على وجهة نظر ديال الدولة وهادي كيديروها بزافت الصحف والمواقع ومن حقهم٬ لكن باش كيجي خبار عندو معنى كبير سياسي بحال التعديل الحكومي او غيرو رسلوه للمجلة الفرنسية ديال التونسي. احترمو غير شوية هادوك اللي تعايرو بسباب المغرب وعطيوهم يا سيدي لخبار وما يخرجوش البراني.
دعمكم خليوه عندكم ما محتاجينوش منكم. خبار المغرب ماشي من حقكم تعطيوها للفرانسيس اللي كيحتاقروكم وكيحتاقرو لمغاربة. شوفو غير اش دايرين علي قضية الڤيزا