الرئيسية > كود سبور > الخضرا خاصها تبقى كبيرة. منين جا البدراوي اللي قاليك باغي يرجع للخضرا امجادها. شركتو “اوزون” تاريخ فشي شكل وصفقات عليها بزافت الاسئلة بداها مع شباط وحمدي وسالاها مع جماعات اخرى
26/05/2022 09:00 كود سبور

الخضرا خاصها تبقى كبيرة. منين جا البدراوي اللي قاليك باغي يرجع للخضرا امجادها. شركتو “اوزون” تاريخ فشي شكل وصفقات عليها بزافت الاسئلة بداها مع شباط وحمدي وسالاها مع جماعات اخرى

الخضرا خاصها تبقى كبيرة. منين جا البدراوي اللي قاليك باغي يرجع للخضرا امجادها. شركتو “اوزون” تاريخ فشي شكل وصفقات عليها بزافت الاسئلة بداها مع شباط وحمدي وسالاها مع جماعات اخرى

عمر المزين كود فاس //

الملياردير عزيز البدراوي اللي دار لفلوس بالزبل من خلال مجموعتو القوية “أوزون”، عليه الهضرة بزاف داخل فريق الرجاء البيضاوي. اعلن على ترشيحو للخضرا. باغي يحل مشاكلها. واش بصاح هادا هو هدفو ولا باغي ينقي سيرتو.

قليل اللي كيعرف مزيان البدراوي وفضايعو فتدبير قطاع النفايات على المستوى الوطني. باش يجي يقول لبيضاوة غادي يوقف مع الرجا ويرجع ليها أمجادها كتبان فشي شكل.

دابا كلشي باغي يدير ليه صورة نقية. صورة رجل اعمال واعر. بدا من الزيرو ووصل ل”اوزون”. غير هي الامور ماشي وردية. فيها روايح فشي شكل.

نمشيو لقطاع النظافة اللي واخد فيه صفقات بعدد من المدن المغرب بحال سلا والعيون وفاس و و و و و… فهاد المدن المواطنين يمكن يلاحظو شي كاميوات عيانة. يعني كاين مشكلة كبيرة فالاليات فوسائل الخدمة.

ظاهرة أخرى رصدتها “كَود” في بعض المدن بحال سلا، كاين شي عمال نظافة خدامين مع البدراوي مساكن ولاو كيساعو. عددهم قليل ولكن كاينة هاد الظاهرة. كيفاش هاد السي البدراوي كيقوليك كيدير العمل الخيري مع الفنانين وباغي يرجع للرجا الأمجاد ديالها و و و.. وشي مستخدمين معاه كيطلبو؟

البدراوي الذي أصبح يتحكم في تدبير قطاع النظافة في المغرب، كيف وصفاتو مصادر “كَود”، معروف في دفاتر التحملات اللي سيناها مع الجماعات اللي خدامة فيها شركتو متهمة من قبل منتخبين باللي ما كتحترامش دفاتر التحملات. سيبة كبيرة كاينة وتمكن هاد السيد باش يسكت كولشي.. كاين رؤساء جماعات ونواب ديالهم وحتى ناس خراين ساكتين على فضايحو.

مثلا فمدينة فاس هادي سنوات وشي لجنة كاينة وسط الجماعة، فيها مهندس، هي اللي كتدير التتبع ديال قطاع النظافة مع هاد البدراوي.. عمر هاد اللجنة قالت شي حاجة ماشي هي هاديك. وضعية الزبل فالمدينة يقدر كلشي يشوفها. كيفاش ديما العام زين.

وشددت مصادر “كَود” على أن الداخلية تتحمل المسؤولية في افتحاص دفاتر تحملات شركة “أوزون” فجميع المدن اللي كتدير فيها تدبير قطاع النظافة حقاش المسؤولين الجماعيين ساكتين، وتشوف حتى قيمة الصفقات اللي كيدير مع الجماعات الترابية وشحال كيشغل فيها ديال الناس؟ وواش متناسبة مع دفاتر التحملات الموقعة بهاد الخصوص؟

“كَود” هضرات مع بعض مدراء شركات فقطاع تدبير النظافة. طبعا منافسين ليه. هادو كيقولو باللي البدراوي متحكم في صفقات قطاع النظافة على المستوى الوطني، وتساءل أحدهم قائلاً: “فين هي المساواة فالصفقات العمومية باش يفتحتو آفاق للشركات كلها؟”.

أكثر من ذلك، هادي أيام قليلة أعلن رئيس جماعة صفرو عن تقديم استقالته من بعد رفضه ضغوطات من عامل الإقليم لتمديد صفقة مع شركة “أوزون” وطالبها بأداء مليار و600 مليون سنتيم.

رئيس جماعة صفرو، التجمعي وشاك، كان فرض على شركة “أوزون” باش تخلص غرامات مالية لفائدة الجماعة بمبلغ فات مليار و600 مليون سنتيم.

المهم السي البدراوي بدات مللي خدا أول صفقة ليه ديال النظافة ففاس بطريقة كلشي عارفها كيف دازت فعهد العمدة السابق حميد شباط. بعدها مشى لاستقلالي اخر هو حمدي ولد الرشيد فالعيون.

كاين امور كثيرة مسكوت عليها.

الرجا فرقة كبيرة. خاص اللي ياخدها يكون بحجمها وما يمكن ياخدو حتى واحد فالقطاع اللي خدام فيه. طبعا ما كاينش الانبياء فالبيزنس ولكن ايلى غدا خدا هاد البدراوي الراجا ووقعات مشاكل نظافة ففاس راه الخضرا اللي غادية تخلص واخا ما عندها علاقة.

موضوعات أخرى

28/03/2024 09:00

محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون

28/03/2024 03:00

السروال ديال مقدم برنامج بريطاني داير أزمة فكوريا الجنوبية.. ها شنو دارت القناة ديالهم- فيديو

28/03/2024 02:00

مصور عندو 71 عام اتاهم الوالد ديال تايلور سويفت أنه تعدا عليه بالضرب ملي كان كيصورها