مصطفى الشاذلي – كود سبور//
ياسين الخروبي، حارس الوداد البيضاوي، دافع على راسو، بعدما تسبب فأخطاء كارثية فكلاسيكو الجيش الملكي نهار الثلاثاء الماضي، وخسر فريقو بثلاثة لواحد.
الخروبي خرج بتدوينة أكد فيها بلي ما كانش واجد لهاد الماتش، حيت كان مريض وما تخبر بلي غادي يطاكي إلا قبل 4 ساعات فقط، وأكد “ما كنتش واجد ما خبرونيش بكري، وهاد الماتش غادي يبقى الأسوأ فالكاريير ديالي”.
تدوينة الخروبي، لي وجهها لجمهور الودادي، ونشرها عبر حسابه الشخصي في “انستگرام”، أكد فيها أن عاش ليلة حزينة من بعد الماتش، وما غاديش ينسى هاد اليوم، لأنه لم يكن مستعدا وكان كايعاني من ضربة خايبة، لي تعرض لها قبل 3 أسابيع.
الخروبي قدم رسالة اعتذار لجمهور الوداد البيضاوي، واعترف أنه كون ما لعبش هاد الماتش واخا مضروب كون الوداد خسر الماتش فورفي، لأن رضا التكناوتي مضروب وطه مريد عندو الحمرا، وما يمكنش ليه يلعب الماتش.
واكد الخروبي أنه قرر يوضح الأمور للجمهور الودادي، كما هي ما شي باش يقدم الأعذار على الأخطاء لي ارتكب.
ورغم معاناته النفسية، إلا أن الخروبي شكر جمهور الوداد على دعمه ومؤازرته، مؤكدا أن السقوط سنة الحياة في بعض الأحيان، وأن النهوض مجددا بعد فضيلة.
.