عفراء علوي محمدي- كود//

علنات وزارة الصحة على تسجيل 73 إصابة جديدة بفيروس كورونا المستجد فهذ 24 ساعة الأخيرة، وهكذا وصل عدد المصابين فالمجموع لـ8610، أي بمعدل23,7 لكل 100 ألف نسمة.

وكشف معاذ المرابط، منسق المركز الوطني لعمليات الطوارئ العامة بوزارة الصحة، فالندوة اليومية للترصد الوبائي لفيروس كورونا المستجد،أن جهة مراكش آسفي هي اللي سجلات اليوم أعلى حصيلة ب32 حالة تكتشفو فبؤر عائلية، كتجي موراها طنجة ب26 أغلبهم فبؤرة صناعية لا تزال نشيطة، و9 حالات بمدينة فاس، و5 حالات فجهة كازا سطات لمخالطين، وإصابة فمدينة القنيطرة لمخالط.

والإصابات اللي تسجلات اليوم تكتشفات منها 63 عن طريق عملية تتبع المخالطين، وهكذا وصل مجموع المخالطين لـ49636 مللي بدا الوباء، وبلغ عدد المخالطين تحت المراقبة 5990.

وتسجلات 35 حالة شفاء اليوم، ووصل المجموع لـ7618 حالة، أي بنسبة تعافي ديال 88,5 فالمية.

وتسجلات وفاة وحدة فطنجة، وهكذا وصل الطوطال لـ212 ، واستقرات نسبة الإماتة ف2,5 فالمية.

وأغلب الجهات مسجلة معدل وفاة أقل من المعدل الوطني، وكيتعلق الأمر بجهة كَلميم وادنون اللي سجلات 2,2، وجهة كازا سطات اللي سجلات 1,8، وجهة الرباط سلا اللي سجلات 1,5، وجهة درعة تافيلالت اللي سجلات 0,9، بينما جهة العيون الساقية الحمرة والداخلة واد الذهب بدون وفيات.

والحالات النشيطة بلغ عددها 780 حالة، أي بمعدل 2,1 لكل 100 ألف نسمة، وأغلب هذ الإصابات كتتوزع بين كازا سطات (246)، ومراكش آسفي ب198، ثم طنجة تطوان ب156 حالة نشيطة، و85 حالة فالرباط سلا القنيطرة، بينما جهة درعة تافيلالت والداخلة واد الذهب خاليين من الحالات النشيطة.

واليوم تستبعدات 16478 حالة إصابة بالفيروس، ووصل المجموع لـ380532 بعد ما خرجات تحاليلهم سلبية.

وبالنسبة للحالات اللي كاينين فالإنعاش فكيبلغ العدد ديالهم 10، أغلبيتهم كاينين فكازا سطات (7)، و3 حالات بجهة فطنجة تطوان، و4 منهم تحت التنفس الصناعي.

وهذا التوزيع الجغرافي للإصابات بالنسبة المئوية: