أسماء الغربي- كود//

عرفات “كود” من مصادر مطلعة بللي جوج كلينيكات خاصة فكازا طلبات لفلوس للدولة باش تعالج المصابين ديال فيروس كورونا المستجد.

وكتحجج المصحات، اللي كانت قبل طلبات الدعم من صندوق مواجهة جائحة كورونا، بللي هي مايمكنش توفر إمكانية العلاج بالمجان إلا إلى عاوناتها الدولة، لكن حتى شي حد ما ضربها على يديها باش تعالج الناس بزز أو تتكفل بيهم، وهي اللي كتنقز.

وواخا الجمعية الوطنية للمصحات الخاصة كانت علنات بللي الكلينيكات اللي غادي يستقبلو مرضى “كوفيد 19” غادي يتطوعو مجانا من أجل الوطن، وماغادي يطلبو حتى ريال لا من الدولة ولا من المصابين، إلا أن مزال مصحات خارجة من الجماعة، وكتطلب الفلوس لهذشي.

وللإشارة، كاينين كلينيكات مزيانة اللي تطوعات وعالجات من 10 حتى ل30 مصاب بكورونا، وماطلباتش تكاليف العلاج من الدولة.

وسبق للجمعية المغربية للمصحات أكدات بللي الكلينيكات، إلى جانب السبيطارات العمومية فالمغرب، وبتنسيق مع وزارة الصحة، تجندو للمساهمة فالقضاء على الوباء، وبللي الهاجس ديالها الوحيد هو الانخراط فمحاربة كورونا وماشي الفلوس.

وكانت أكدات الجمعية بللي الكلينيكات خصصو فهذ المرحلة 500 سرير رهن إشارة المرضى، من ضمنها أسرة إنعاش.