نجوى المالحي-كود//

خرج فيديو كيوثق كيفاش الممثل طارق البخاري كيبوس فراس محمد الجم وكيطلب منو سماحة، لكن هاد الاخير رفض يسمح ليه واخة الخصام لي بيناتهم داز عليه 15 عام دابة.

طارق البخاري بقا كيطلب سماحة مرات كثيرة قدام الناس الحاضرين، لكن الجم قال ليه واخة دوز 100 عام ماشي غير 15 عمرني نسمح لك.

من بعد ما داع الفيديو فأنترنت، خرج البخاري فستوري على الانستكَرام وكتب “الحمد لله قلبنا ابيض خلي من الحقد والضغينة نحترم شيبة الناس و سنهم. حنا كدوز غير سيمانة كنساو اللي غلط فينا وضرنا وبنادم من عام الفيل حاقد
عليك”.

وعلى حسب البخاري هاد الخصام بدا فواحد التصوير، ملي مقبلش كلام الجم لي وصفو ديك الوقت ب”براهش ديال الضومين”.

والفيديو كيتسمع الجم كيقول لواحد السيد أنه قال ليه الا كان البخاري ولا الخياري ميجيش للحدث، وبان معصب نيت وحاقد على البخاري ديال بصح.