كود سبور//

تذاكر ماتش المنتخب الوطني المغربي ومنتخب البرازيل مثلها مثل أسعار المواد الأساسية وأسواق الخضرا والفواكه شاعلة فيها العافية، وذلك قبل يومين من انطلاق المواجهة الودية على ملعب طنجة الكبير.

ومن بعد الطريقة المثيرة للجدل اللي تم بها بيع تذاكر ماتش المنتخب الوطني المغربي مع منتخب البرازيل، على الموقع ديال الجامعة الملكية المغربية لكرة القدم وسرعة نفاذ التذاكر اللي تحطت فالسيت المذكور على دفعتين، والمشاكل اللي كانت ديال الاعطاب بالموقع والضغط الكبير والطابور، غزت التذاكر السوق السوداء والثمن غالي.

وتفاجأت الجماهير المغربية على مواقع التواصل الاجتماعي بتذاكر ماتش المنتخب الوطني المغربي والبرازيل وهي منتشرة البيع وبكثرة ولكن الاثمنة طالعة كتفوت 800 درهم، وهادشي كيثير الاستغراب خصوصا وأنه كيجي من بعد فضيحة تذاكر مونديال قطر واللي كل شي كيتسنا نتائج التحقيق فيها، وكيطرح علامات استفهام كبيرة على شكون المسؤولة على المارشي نوار وكيفاش طلع ثمن التيكي د ماتش المغرب والبرازيل من 100 و 300 درهم إلى 800 و 900 درهم وكثر، اواش الجهات المسؤولة مازال ما لقاتش حل باش تحد من هذه الظاهرة اللي كتشوه كرة القدم والرياضة المغربية، خصوصا وأن المملكة المغربية تحت قيادة سيدنا مقبلة على الترشح مع إسبانيا والبرتغال بملف مشترك لتنظيم كأس العالم 2030.

وكتجي تذاكر ماتش المنتخب المغربي والبرازيل والاثمنة ديالها تزيد تنكدها على الجمهور المغربي العاشق للمنتخب الوطني واللي كان معول يمشي لطنجة يبدل الجو شويا ويتفرج فالركراكي و وليداتو ونجوم البرازيل وينسي شويا هم غلاء أسعار المواد الأساسية وغيرها اللي كيتزامن مع بداية شهر رمضان، ولكن المارشي نوار زادت زعفت عشاق ليكيب ناسيونال اللي كيموتو على المنتخب الوطني المغربي وكيبغيو يكونوا حاضرين فكل مناسبة وطنية أو رياضية باش يبينو على تمغرابيت ديالهم.