هناء ابو علي-كود//

كتبت الصحف الجزايرية على زيارة بن سلمان للجزاير العديد من المقالات و التحليلات خصوصا على سبب رفض بوتفليقة يتلاقا به بدعوى اصابته بالزكام، ومن بين ماكشفت عنه شي مقالات اطلعت عليها “كود” ان الجزايرين طلع ليهم الدم من الحجم الصغير  د الاستثمارات اللي جاب معه الامير السعودي مقارنة بالاستثمارات اللي دار ف تونس و فاقت الملايير..

الجزايرين قالو بلي  حجم الاستثمار اللي جابو السواعدة لا يتعدى 100 مليون دولار وف قطاعات ماشي استراتجية بحال صناعة ورق المراحيض..

ووخا اسسوا الطرفين  مجلس اعلى للتنسيق الجزايري السعودي ف ماهضروش على انتاج النفط الي مختلفين فيه بزاف حيث السغودية من زمان و هي كتنتج بزاف باش تطيح الثمن الشي اللي الجزاير ماكتحملوش..وهادشي الي خلا بوتفليقة يرفض اللقاء غالبا..

محلل موقع الشروق الجزائري قال ان اهم ما خرجو به ف هاد الزيارة هو  ” الجزائر  حصلت على تطمينات بشأن تغيير موقف المملكة من بعض القضايا التي تهم الجزائر وعلى رأسها القضية الصحراوية”..

و يضيف ” وعليه يمكن القول إن الجزائر نتظر من المملكة العربية السعودية موقفا داعما لحق الشعب الصحراوي في تقرير مصيره” على حد تعبيره.