سهام البارودي – كود//
لي متبع الصراع لي داير فالصحراء و كايشوف الصفحات ديالهم نشيطة غايبان ليه بلي خدامين على البروباگاندا على قدم و ساق ! الفيديوات لي تحطو هاد اليوماين على انهم فيديوات ديال حرب بين الجيش المغربي و مرتزقة البوليزايرو بروشيرش صغيرة تقدر تعرف انهم فيديوات مفبركة ديال معارك فسوريا و العراق شي مرات كايخليوهم كيما هوما و شي مرات كايبدلو ليهم الصوت و يدخلو فيهم صوت صحراوي باش يعطيو للفيديو مصداقية !
البوليزاريو دايرين حتى بروفيلات وهمية للاشخاص كايبانو ظاهريا مغاربة باش يقنعوك اخي المغربي انه كاينين مغاربة فحالك كايساندو البوليزاريو و باش ينشرو اشاعات عن وفاة جنود مغاربة فالصحراء !
مشاو بعيد و سجلو اوديوات بصوت جنود مغاربة زعما زعما كايعاودو على التكرفيص لي عايشينو و بلي البوليزاريو غالباهم و بلي خايفين و هادشي طبعا كولو كذوب !
المهم لي كايشوف شنو كايديرو البوليزاريو فوسائل التواصل الاجتماعي غايبان ليهم بلي ناشطين بزاف و كايستعملو گاع الوسائل من كذوب و خداع و تدليس و فبركة للفيدويات و الاوديوات باش ينشرو الاطروحة ديالهم و يزعزعو الاستقرار !
هادشي علاش مايمكنش الدولة المغربية و المؤسسة العسكرية تبقا خدامة بطرق التواصل الكلاسيكية ! خاص التجديد و خاص الحرب الالكترونية تبدا! بفيديوات من قلب الحدث و حوارات و روبورطاجات و علاش مانشوفوش شي دور لهادوك المؤثرين لي عندهم آلاف المتابعين فهاد المعركة الالكترونية ! التلفزة و الراديو و البيانات الرسمية ماكافينش اليوم شكون كايتسوق ليهم ؟! الاجيال لي عايشة دابا كاتشعل التلفزة غي باش تفرج فنيتفليكس و لا تلعب البلاي و كاطفيها ! الناس كاتقلب على الخبر فالفايسبوك و وواتساب و يوتوب و هادشي علاش المغرب خاصو يكون حاضر بقوة فهاد الوسائل و يروج للقضية ديالو فهاد الوسائل و يدير التعبئة عبر هاد الوسائل !
كاينين الوسائل التيكنولوجية و كاينين الخبرات و كاينين الصحفيين و الدراري و البنات لي معطي ليهم هادشي ! راه واخا نربحو المعركة فارض الواقع الا ماكانتش مواكبة اعلامية حقيقية راه كيوالو !!
