الرئيسية > آراء > التضامن و الخير مزيان و لكن ماشي هوا الحل للقضاء على الفقر ! مايمكنش نبقاو عايشين شي مخشي فشي! خاص الدولة دير خدمتها و تبين حنة يديها و إلا غانبقاو عايشين مع قنبلة غاتفرگع علينا فوجهنا شي نهار‎
24/11/2017 09:00 آراء

التضامن و الخير مزيان و لكن ماشي هوا الحل للقضاء على الفقر ! مايمكنش نبقاو عايشين شي مخشي فشي! خاص الدولة دير خدمتها و تبين حنة يديها و إلا غانبقاو عايشين مع قنبلة غاتفرگع علينا فوجهنا شي نهار‎

التضامن و الخير مزيان و لكن ماشي هوا الحل للقضاء على الفقر ! مايمكنش نبقاو عايشين شي مخشي فشي! خاص الدولة دير خدمتها و تبين حنة يديها و إلا غانبقاو عايشين مع قنبلة غاتفرگع علينا فوجهنا شي نهار‎

سهام البارودي كود ////

كيما العادة الخبر ديال وفاة دوك خمسطاشر مرة لي مشاو ياخدو المعاونة من عند واحد السيد فسيدي بولعلام فآسفي بدا كايتنسى!و غير بانو التصاور ديال التيكيات ديال حفلة أيمن السرحاني مول أسايس اسايس لي الثمن ديالهم وصل تال تسعالاف درهم و المنادلين الفايسبوكيين نساو العيالات لي ماتو و ركزو مع ” أسايس” “أسايس” !

بالنسية للعيالات ! الله يرحمهم و الله يصبر عائلاتهم و لكن واخا القضية ديالهم بردات واحد السؤال باقي كايدور ليا فراسي و لي كانشوف بلي خاصو يتطرح.

واش التضامن مع الفوقارا بتفراق الطحين كيما شفنا فسيدي بولعلام كافي باش تتحسن وضعيتهم ؟

طبعا لا ! تفراق الطحين و الزيت على عائلة فقيرة فالمغرب ماغايبدل فحياتها والو فالحقيقة ! غايعجنو الخبز واحد يوماين ثلت أيام و غاتسالي الخنشة د الدگيگ و غايبداو يحنززوا فبعضياتهم ! ايه التضامن مزيان ! و كاين فأعتى الدول المتقدمة، ففرانسا مثلا كاينين “ليريسطو دي كور” مؤسسة كبيرة خدامين فيها ناس و متطوعين خدمتهم هي يفرقو الماكلة على المتشردين و لي مافحالهمش ! حنا فالمغرب التضامن عندنا معروف من القديم كايتمارس بشكل شخصي ماشي بشكل مؤسساتي لمجموعة من الأسباب من بينها أنه الاساس فالتضامن عندنا هوا العلاقات الانسانية، الحاج فلان لاباس عليه عندو رزقو و معروف فالدرب و لا فالدوار ( فحال ولد زروال) لي خاصو شي حاجة كايقصدو! كايشري العيد لشي هجالة هي وولادها، كايختن شي يتيم، كاياخد شي مطلقة و يتكلف بالربايب، كايشري الدوا لشي بوفري عاد خارج من السبيطار و كاتكون دار الحاج هي “الخيمة الكبيرة” ! و لكن دابا مع النمو” الديموغراقي” الكبير و نسبة الفقر لي غادا و كاتطلع مابقاش التضامن المحصور فالأشخاص و المبادرات الفردية كافي، شحال خاصك من حاج و من حاجة باش توكل 4 ديال مليون فقير فالمغرب و تشري ليهم الدگيگ؟ ( 4 د المليون لي مديكلاريين ) راه تجيب حجاج بيت الله الحرام كاملين وتزيد عليهم تا المعتمرين و مايقدوكش لگاع هاد الفام الجيعانة لي عندنا !

داكشي علاش هاد التضامن خاص تواكبو مجهودات الدولة ! مايمكنش نبقاو عايشين مع بعضياتنا شي مضبر على شي ! واحد خدام و عشرة متكيين عليه ! كاتنطابق علينا ديك النكتة ديال هاداك لي مشا يخطب و سولو بات البنت فين خدام آ وليدي جاوبو ” خويا قايد”، خاص الدولة تبين على حنة يديها فمواجهة الفقر و تكون عندها استراتيجية فعالة و برامج حقيقية ماشي دوك البرامج لي كايتبرمجو وسط شي گاميلة و كايضربو عليهم النح و كانشوفو النتائج ديالهم غي فالباور بوينت وسط شي اجتماع فشي وزارة و لا شي روبورطاج فدوزام عن ” تعاونية يزة الجبلية لتربية الأرانب” ! لا بغينا برامج حقيقية تبان النتائج ديالها بالملموس و أولها توفير المناخ للاستثمار و ماشي فكازا و الرباط و حبس المرقة ! لا الاستثمار فالجهات، كيف يعقل ولد تازة لابغا يخدم خاصو يمشي لكازا و ولد زاگورة يمشي لكازا و ولد الخنيشات يمشي لكازا ؟ ياك هادي سنين و حنا كانهضرو على الجهوية للموسعة فيناهوا التطبيق ديالها على أرض الواقع ؟ هاد كازا راه غاتفركع بهاد الضغط لي عليها و لي مخلي لي كايجي ليها مكرفص حيت مبعد على بلادو لي كانت أولى بيه و بالخبرة ديالو و بالمساهمة ديالو فالتنمية و الكازاوي ولد كازا مكرفص حيت بسباب هاد التركيز دفرص الشغل فمنطقة وحدة الكرا غالي ! و الشرا غالي ! و المعيشة غالية بالمقارنة مع مدن أخرى ! و فيمن كاتجي الدقة ؟ فالمزلوط طبعا !

حيت هاد الفوقارا راه خاصهم فين يخدمو باش يصورو طرف د الخبز ديالهم بوحدهم ! التضامن مزيان يكون و لكن مع الفئات لي بصح محتاجة ليه و لي حتى لابغات تخدم ماعندهاش كيف دير ( المسنيين و المعاقيين الحركيين مثلا…) أما واحد بكتافو اعرض من كتاف الزحاف و وحدة بكتافها اكبر من كتافي راه خاصهم يلقاو شي وزين و لا شي مشروع فين يصورو طرف د الخبز يحفظ الكرامة ديالهم من التمرميد فبيبان المحسنين و شاشات القنوات الالكترونية لي طيبات لينا القلب ب” شاهد أسرة تعيش في الكابينة” ” شاهد أسى تسكن في بوطو ديال الضو” ..

راه الفقر آفة ! موصيبة كحلة ! مرض ! كايساهم غي فالمصائب ! الفقير كايعيش مديكالي على العالم و على المجتمع ! كايعيش على الهامش ! هو اللخر فالقراية و هو اللخر فالتطبيب و هو اللخر فالماكلة و هو اللخر فالمعيشة … كايكبر ككائن مديكالي مع العصر لي كاينتامي ليه، مريض، حازق، گاع البيبان مسدودين فوجهو تالابغا يقلب على الخدمة كايلقا راسو مامكونش! آش كايدير ؟ كايتعايش مع الفقر ديالو وسط شي براكة و كاياخد شي فقيرة و كايولدو الولاد و كايقمرو براسهم و بولادهم فمتاهة كبيرة سميتها الحياة.

و هكا المزلوط كايولد مزاليط اكثر منو و تاهوما كايولدو موزاليط اكثر منهم و كايبقاو آل بناني سميرس كايورثو الفلوس جيل على جيل و لوزينات و الطوموبيلات و بعيرير مسيكين كايورث الفقر لولادو جيل على جيل.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه

29/03/2024 00:00

نقابة الصحافة زادت دروس أخرى على دروس “الهاكا” فقضية فبركة جريمة شفرة على المباشر.. كنبهو للانزلاقات الكثيرة لي كتوقع فعمل بعض الإذاعات الخاصة ويجب إعادة النظر فالقانون المنظم للقطاع السمعي البصري