كود الرباط///

حزب البيجيدي لي كيظل النهار كامل كيتغنى بمحاربة الفساد، لبارح السبت استقبل بالاحضان زعيم الحزب الاكثر تمثيلية للفساد فالمغرب، اللي هو عبد اللطيف وهبي امين عام حزب الاصالة والمعاصرة لي كينتميو ليه الكثير من الفاسدين والمتهمين بنهب المال العام والشفارة.

باش مايقولش وهبي هادشي كذوب غانعطيوه الارقام والاسماء ديال المتابعين فحزبو، غانبداو بعبد النبي بعيوي لي محكوم بعام دالحبس ومازال قضيتو مبلوكية بقدرة قادر فمحكمة النقض، ومابغاش عبد النبوي او قضاته يحركوها والتحكم قبل الانتخابات، كيجي موراه البرلماني السابق ورئيس بلدية تارجيست السابق عمر الزراد البامي لي تشد برشوة سبعين مليون باش يعطي رخصة تجزئة.

كيجي موراهم البامي الرئيس السابق لبلدية الجديدة عبد الحكيم سجدة لي تعتاقل هو ومهندسة بامر من وكيل الملك فسيدي بوزيد بتهمة التلاعب فصفقات عمومية، كيجي موراهوم رئيس جماعة واحة سيدي ابراهيم والمستشار البرلماني عن البام لي تعتاقل بسباب جناية الارتشاء.

فوق هادو كاين سليمان حوليش البرلماني ورئيس جماعة الناظور السابق لي تا هو بامي وتعتاقل بسباب تبديد أموال عمومية، بالاضافة للنائب الاول الاول دحوليش حسين اوحلي لي تا هو بامي وتعتاقل معاه.

اكثر من هادو كاين الرئيسة السابقة لجماعة اهل سيدي لحسن نواحي صفرو، لي تعتاقلات بسباب النصب والاحتيال وحتى هي بامية، زيادة على  البرلماني البامي المحكوم بعشرة سنوات، لي تعتاقل حقاش اسس شركات وهمية مع عصابة ونصب على الدولة فأزيد من 200 مليار سنتيم.

من غير هادو كاينين بزاف ديال المتابعين او اللي تحطات ضدهم شكايات اما بالفساد السياسي او المالي، وكايجي البيجيدي كيقول انه حزب كيحارب الفساد، وهو دابا باغي يحتاضم الفساد كولو ويتحالف معاه.