كود الرباط//
علمت “كود” من مصادر مطلعة أن المتطوعات البلجيكيات لي قادو طريق واعرة ف دوار اضارنومان بإقليم تارودانت، ولي تعرضو لحملة هجوم فالفايسبوك، كيعيشو حالة هلع خصوصا بعدما اتصلو بهم عائلتهم من اوربا.
وحسب مصادر “كود” فإن الفوج ديال المتطوعات والمتطوعات لي جاو مع جمعية بورد البلجيكية لدوار اضارنومان باقليم تارودنات، متواجدين ف الصويرة كيديرو السياحة، بعدما كانو لبارح ف مدينة تارودنات، وغذا متوجهين لمراكش باش يديرو المغادرة النهائية.
البعض من هاد المتطوعات والمتطوعين استطعو يقنعو عائلتهم بلي مكاين تا شي تهديد يقدر يمسهم وشكرو المغرب لعائلتهم، لكن 3 د الحالات مقدروش يقنعو عائلتهم وطلبو منهم يجيو ف البلاصة بلا ميزيدو نهار خوفا على حياتهم.
في المقابل كشفت مصادر مقربة من منسق جمعية بورد بأنه كاينا حماية أمنية متقدمة وكاين تتبع لمسار هاد المتطوعات والمتطوعين، معبرا عن شكرا للتفاعل الآني والسريع للأجهزة الأمنية بمختلف درجاتهم منذ أول تدوينة دارها استاذ، حيث حضرو بكثافة لديك المنطقة وراقبهم عن بعد بلا ميديرو ليهم تا شي ازعاج، يقول مصدر “كود”.
البرنامج طبقوه وفق مصدر “كود”، لكن التشويش لي كان والتهديدات خربقات كولشي، “كيعيشو خوف هادشي كيخلعهم خصوصا وأن المغرب عاش قبل اشهر على وقع جريمة ارهابية خايبا بزاف ملي تذبحو جوج لسائحات اسكندنافيات وكيفاش مازال الناس مخلوعة من المغرب وهادشي كيزيد يقودها على السياحة” تضيف مصادر كود”.
