نايضة فالجزائر: جمهور اتحاد العاصمة غاضب وناض للكابرانات حيث ضحاو بالفريق لخلق مشكل مع المغرب
سهام البارودي – كود//
الحاجة لي ماخافية على حتى شي واحد فالمغرب من وزير الاقتصاد و المالية حتى لأصغر مول الكروسة كايهز الخضرة فثنين شتوكة ! هي انه القطاع الغير المهيكل و بنادم لي خدام فالنوار ماكايخلصش الضرائب للدولة كايشكلو جزء كبير من الاقتصاد الوطني! بعض الاحصائيات كاتهضر على ثمانين فلميا … لي هوا رقم كايخلع الصراحة !
الدولة دارت بعض المجهودات الخجولة فهاد الناحية فحال خلق اطار ” المقاول الذاتي” لي ساهل و بسيط انك ديرو و كايمكنك انك تخدم فالضو و تخلص الضرائب ديالك ! المشكلة انه من الستينات لدابا و المحاولات د الدولة للسيطرة على القطاع الغير المهيكل مافيهاش ريحة الجدية ! فحالا ماكايشكلش ليها مشكل و ماكاتشوفوش اولوية !
ايه حقا هاداك القطاع كايخدم جزء كبير من المغاربة ! الخضارة ! مالين الكرارس ! العمال الفلاحيين ! السرباية ! الطيابات د الحمام ! صحاب الطوابل ديال النضاضر و الماگانات فالمعاريف، مالين الببوش ! البلومبي ! التريسيان و بزاف د الخدامي لي ماليهم عايشين فالنوار سنوات و سنوات و لي ماكايخلصوش الضريبة على الدخل و اغلبهم ماعندهمش تغطية صحية !
هادشي راه مايمكنش الدولة تبقا غادية بيه مدة طويلة ! و الخطورة ديالو بانت بشكل كبير فاش جات الجائحة ديال كورونا و بدات الدولة كاتحارب على عدة جبهات ! ماحيلتها لكورونا ! ماحيلتها لبنادم لي جالس بلا خدمة و خاصو ماياكل ! ماحليتها لصحاب القطاع المهيكل لي الشركات لي مخدمينهم وقفو ! ماحليتهم للقطاع الغير المهيكل … و هادشي خلانا نطيحو فواحد المقاربة مافيهاش ريحة العدل بتاتا !
حيت فيناهوا العدل فأنه تاخد فلوس من واحد كايخلص الضرائب و تعطيهم لواحد ماعمرو خلص شي ضريبة ؟! غاتقوليا التضامن و كدا غانقوليك التضامن ماكايبنيش دولة ؟ ماكايحطش اسس اقتصادية ! ماكايساهمش فبناء الدولة الحديثة ! التضامن خاصو يكون غا خضرة فوق طعام و مع فئات لي فعلا ماعندهاش الامكانية انها تخدم و تكون منتجة اقتصاديا فحال المعاقين و العجزة و صحاب الامراض المزمنة… اما واحد كتافو صح من كتاف الزحاف و خدام مع راساتو كايبيع التيليفونات فشي طبلة فدرب غلف و لا عندو شي بيكوب كايبيع فيها الخضرة راه ماعندها تا معنى تحيد من فلوس دافعي الضرائب و تعطيه … علاش ؟ حيت مانجحتيش تلقا ليه شي طريقة باش تدمجو فالاقتصاد !
معم بزاف انه الدولة تلقا حلول لادماج الناس د القطاع الغير المهيكل ! بالخاطر ! بالغرامات ! هاد السياسة ديال قضي و عدي و سكتو نباتو راه ماشي ديال الدوام و قد ماطولات قد ماكاتزيد تغرق للبلاد الشقف!