كود علي الصافي العيون ///

حزب الاستقلال كيضحك على كلشي. دار بيان بعد اجتماع اللجنة التنفيذية ديالو البارح الثلاث 15 فبراير 2021 حذر فيه مما سماه “خطورة سعي الاتحاد العام لمقاولات المغرب تعديل القوانين بهدف حرمان أعضائها الراغبين في الترشح من حقهم الدستوري في الانتماء السياسي الذي يكفله الدستور وجميع المواثيق الدولية تحت ذريعة الحياد، وهو ما يعتبر خرقا لمبادئ الدستور وعملا تمييزيا مخالفا للقوانين”

ومشى اكثر باش قال باللي الاتحاد العام لمقاولات المغرب كيدير “حروب سياسية بالوكالة لفائدة حزب معين، وتفصيل قوانينه لخدمة أغراض سياسية وانتخابوية، وهو ما سيتصدى له حزب الاستقلال انطلاقا من حرصه على الحياد التي تميزت به هذه المنظمة المهنية قبل أن يتم اختراقها من الحزب المعلوم واقحامها في حسابات سياسية”

ولكن اش دارت الباطرونا باش الاستقلال يتقلق بهاد الطريقة. الباطرونا قررات ان الرئيس ديالها ورئيس مكاتبها الجهوية ما خاصوش يكون عضو فالمكتب السياسي لشي حزب سياسي. يعني هاد الشي اللي كيقولو حزب الاستقلال فبيانو غير كيكذب.

ولكن اجيو بعدا شكون اللي سيس الباطرونا من غير حزب الاستقلال. كنهدرو على التسييس هو ان عضو فمجلس المستشارين تابع للباطرونا هو استقلالي. ماشي اي استقلالي بل هو كيتسخر لحمدي ولد الرشيد الرجل القوي فالاستقلال. الامر يتعلق بمحمد سالم بنمسعود اللي داير جورنال ديال الاستقلال اسمو “زوم صحارا”. ماشي ديالو غير هو للي مكلف بيه. هادا كيتسخر لحمدي ما عندو علاقة لا بالمال ولا بالاعمال.

هنا كنفهمو ان خرجة الاستقلال ماشي دعم لاستقلالية الباطرونا بل دعم لهيمنة حمدي ولد الرشيد على كل ما عندو علاقة بالصحرا. وحتى فيدرالية الناشرين اللي دارت اجتماعها فالصحرا نهاية الاسبوع اللي فات رسلو مرشح ديالهم. كيدعمو هاد بنمسعود والنعم ميارة رجل اخر لحمدي ولد الرشيد واللي عطاوه الاتحاد العام للشغالين بالمغرب.

شفتو علاش كيدافعو؟ هما للي دخلو بنمسعود للباطرونا باش يدافع علي الاستقلال. هما اللي سيسو كلشي