كود هند لكلاوي ////

التجمع الوطني للاحرار ناوي يربح انتخابات 2021 طبعا بحالو بحال جميع الاحزاب السياسية غير هو خدام كيوجد. الوحيد فالاحزاب من نهار ولى عزيز اخنوش رئيسو اللي كيدير لقاءات جهوية وبمعدل منتظم. هاد الصباح كانو فمراكش. وقع تدخل كيبين هاد الرغبة فالفوز وطبعا فالانتصار على العدالة والتنمية اللي هامو هاد الايام غير تصفية تركة بنكيران والقضاء عليه نهائيا.

خلال كلمة رئيس الحزب هاد الصباح بعد تدخل لمياء بوطالب كاتبة الدولة في السياحة واللي كانت بدارجة مزيانة٬ وقال اخنوش “ها انتوما شفتو تبارك الله كيفاش لمياء بوطالب متحمسة” واعتبرها تجسد “ليسبري =الروح= اللي بغينا فالحزب”. لكن السياسة دارها فالفقرة الموالية عندما جبد هادوك خياتي اللي ضحكو عليها فالبرلمان =اللي هما جوجات برلمانيات من البي جي دي= وذكر انه تعاملو معاه نفس المعاملة باش يالله بدا وقالو٬ كيف قالو على لمياء بوطالب٬ راها ما كتعرفش تهدر بالعربية٬ واكد “غير يستسناوها ف2021 والله ما غادية تفاك معاهم”.

هادي فيها قراءات منها ان بوطالب راجعة وزيرة ف2021 وحزبها غادي يربح فالانتخابات وغادي يجي اللول ويسبق عضوات الحزب اللي ضحكو عليها اي حزب البي جي دي