محمد سقراط-كود///

الحجر الصحي كنظن بزاف ديال المغاربة وقع ليهم بحال باقي سكان العالم من غير الآسيويين ، وفهموه على أنه ماتخرجش للزنقة وتعيش حياتك العادية، ولكن إلى كنتي داير الحجر الصحي راه يمكن تمشي تشوف عائلتك حتى هوما دايرين الحجر وتديروه مجموعين واحد اليوماين ومن بعد يجيو عندك عائلتك خريين يدوزو معاك الويكاند، المهم هو ماتخرجوش للشارع والقهاوي وتسركلو فالشارع،وهادشي طرا فالطاليان والصبليون وبحالو طرا هنا، الناس في عمارة وحدة كيعرضو بعضياتهم، صحاب كيتجمعو كل نهار عند واحد، بنت مزوجة تدي ولادها يبدلو لجو عند جداهم، يمشيو يتسركلو فمرجان ويجمعو فالسطوحة ديال العمارات، القرارات لي خدات الدولة كانت إستباقية وخلاتنا نتجنبو كارثة كبيرة، ولكن هذا مكيعنيش أننا فلتنا بل فقط تجنبنا مآسي كثيرة كانت غادي توقع، وطبعا بحكم أن الأمر مرتابط بالعامل البشري فراه بحال لي وقع فعدة بلدان من العالم الناس استخفوا بالأمر وماداروش بتعليمات الدولة حرفيا، والنتيجة هي بؤر عائلية كبيرة.

بالإظافة لمشكل آخر ديال السويقات دالخضرة لي ولاو يسدو مع الوحدة، قبل ملي كانو كيسدو مع الستة الناس كيتجنبو يمشيو فوقت واحد، وتقريبا ديما كتلقى السويقة خاوية شوية حيت كل واحد إينا ساعة كيجي وعندو خيار من الصباح حتى للستة، دابا ملي ولات السويقة كتسد مع الوحدة وليت نمشي ليها لقاها عامرة، وأنا نيت عوض نخلي السخرة حتى للجوج أو التلاة كتكون الدنيا خاوية وليت مظطر أنني نمشي بين العشرة والوحدة وطبعا بحالي بزاف، وهادشي سبب الزحام لي هو الهدف الأساسي لي خاص نتجنبوه، بالاظافة الى موالين الكرارس ديال الخضرة والديسير مابقاوش فأي بلاصة وقبالت الجوامع كيف كانو، كتخرج لباب الدار كتقدى وترجع بحالك فالبلاصة، دابا لعكس خاص تبعد باش تلقى حاجات باغيهم، وهادشي هو لي خاص يتم التجنب ديالو هو بنادم يبعد على مقر السكن ديالو.

وحتى هادوك الأرقام ديال المصابين لي نزلو الأيام لي فاتت حتى هوما ساهمو فان بنادم يتطلق شوية ومايبقاش مخلوع، وحس براسو بحال الى صافي راه تغلبنا على الفيروس لي قهر أعظم الدول بالدعاء والكلاس فالدار، وحتى داك التحفظ والخوف لي كان عند الناس فاللول دغية تلاشى وعم شعور بالفرحة والنشوة وقرب الفرج عند الناس، وهادشي خلى بزاف مايبقاوش محتارمين الحجر الصحي كيما خاص، وهادشي عموما طرا حتى فالدول لي الثقافة والوعي فيها طالع، وللأسف هاد المسلسل كيبان باقي طويل وخاص نستعدو ليه نفسانيا وماديا وسلوكيا، حيت حياتنا من وراه غادي تكون مختالفة على حياتنا قبل منو.