كود – وكالات //

حذرات منظمة الأمم المتحدة من أن العالم يقدر يواجه مجاعات لمدة سنوات بسباب الغزو الروسي لأوكرانيا.

وقال الأمين العام للمنظمة الأممية أنطونيو كَوتيريش بللي هاد الحرب زادت من أزمات الأمن الغذائي فالدول الفقيرة بسباب ارتفاع الأسعار.

وزاد قال أنه كاين احتمال كبير باش يعيش العالم أزمة ونقص خطير فالموارد الغذائية فالشهورة الجايين، فحالة مارجعاتش الصادرات الأوكرانية كيف كانت قبل الحرب.
وتسبب الغزو الروسي فوقف الصادرات من موانئ أوكرانيا، اللي كانت كتصدر كميات كبيرة من زيت عباد الشمس والحبوب بحال الذرة والكَمح.

وبهذا تراجع العرض عالميا وبالتالي شعلات العافية فثمن المواد البديلة الأخرى. وتزادت أسعار المواد الغذائية العالمية بنسبة 30 فالمية تقريبا مقارنة مع نفس الفترة من العام الفايت، حسب تقارير ديال الأمم المتحدة.

وقال كَوتيريش، فحديثو نهار الأربعاء فنيويورك، بللي هاد الحرب اللي منوضة روسيا “كتهدد الأمن الغذائي لعشرات الملايين ديال الناس مع ما يترتب عليها من سوء التغذية و جوع جماعي بل ومجاعة حقيقية”.