عفراء علوي محمد- كود//

فالعدد ديال الأربعاء الجاي، جريدة صوت الأزهر، الناطقة باسم “جامع الأزهر”، اعتبرات أن اللباس عمرو كان مبرر للاعتداء الجنسي من تحرش واغتصاب.

وطالبات الأزهر، فالعدد ديالها لجديد، بدعم ضحايا الاعتداء الجنسي وتشجيعهم على الكلام والشكوى، باعتبار أن هذ الجرائم الجنسية غاتزيد تشجع على انتهاك الأعراض ديال الناس وحرماتهم.

ورفضات الجريدة، فالموضوع اللي حطات تفاصيلو فالصفحة الأولى تحت هاشتاكَ “طمنو بناتكم”، (رفضات) لوم الضحية بسبب ما تعرضت له، واعتبارها شريكة فالهذ الجريمة بسبب لباسها او تصرفاتها، على اعتبار ان هذشي غايزيد من هذ النوع من الجرائم، اللي كتشوفها “من كبائر الذنوب وفعل من أفعال المنافقين”.

وقالت أن الاصل هو “غض البصر عن المحرمات”، وبالتالي ف”إلصاق جريمة التحرش بنوع الملابس تبرير واهم يصدر عن ذوي النفوس المريضة”، على حد قولها.

وتزامنات هذ الفتوى اللي صدراتها الأزهر مع حدث تداول مجموعة من النشطاء على مواقع التواصل الاجتماعي لحادث اغتصاب طالب بأكثر من 50 بنت فالجامعة الأمريكية فالقاهرة، واللي من بينهم طفلة عندها 14 لعام، حسب ما يروج.