كود اكادير ///

اكادير ودعات احد رجالاتها. رجل الاعمال سيمون ليڤي تدفن البارح الاحد 1 ماي 2022 بالمقبرة اليهودية بحي احشاش. هاد الشخصية المحبوبة كان عضو فمجلس المستشارين ومستشار بجماعة اكادير ماتت عن 82 عام.

حضرو للگنازة شخصيات من كاع المغرب. من الطائفة اليهودية. من اصدقاؤو فالسياسة فالاعمال. من الناس اللي ساعدهم وعاونهم.

كان كيدير الخير. سعيد ضور رئيس غرفة الصناعة و التجارة والخدمات بجهة سوس ماسة وهو صاحب الراحل كيوصفو ب”صديق الفقرا” ديما “يدعمهم ويواسيهم” واضاف باللي كل عيد كبير كان كيوزع على مستخدمي شركتو 3 الاف حولي فابور.

ماشي غير هاد الشي. كان كيدعم القرى لبعيدة ويجهزها فابور وكيقدم خدمات اخرى يضيف صاحبو وعشيرو

محمد باجلات٬ رئيس جمعية “إيزوران” بأكادير وحتى هو صديق الراحل٬ كيذكر فتصريح صحافي٬ ان ليڤي اللي تزاد فالصويرة ف1939 قبل ما يعشق اكادير٬ شارك كمتطوع في عمليات الإغاثة خلال زلزال أكادير في فبراير عام 1960 وباللي ظل ديما كيدير الخير

ليڤي بدا حياتو المهنية كتقني بالكهرباء. خدا ديبلوم من المدرسة الصناعية بالدار البيضاء وولى فبريد المغرب وبعد تجربة مهنية دار شركة ديالو غادية تولي من اشهر الشركات فالتجهيز والمعدات الكهربائية فسوس

سياسيا كان مستشار سنة 1992 ببلدية اكادير وتعاود انتخابو فانتخابات 1997 مع حزب العود. نفس العام دخل لمجلس المستشارين مع الاتحاد الدستوري

مغربي مسكون بتمغرابيت. عاشق لسوس. خدم بلادو ومنطقتو. بلادنا هادي ويجي شي واحد يقسم بين مسلمي ويهود المغرب باسم التعصب لقضايا ما عندنا علاقة بيها

هاد العشق مازال مستمر مع مراتو بنت اكادير دينيس لوك ومع ولادو ايرفي واري وميرييل وداڤيد واحفادهم.