عفراء علوي محمدي- كود//

مدينة طنجة كتوضع اللبنات الأخيرة ديال دار أوبرا فالمغرب، اللي كتتميز بتصاميم معمارية متميزة، وغاتكون قبلة لمجموعة من الفرق من مختلف دول العالم فمجال هذ الفن باش تجي وتنظم سهرات للمغاربة فعروسة الشمال.

نوفل بخات، المهندس المعماري المسؤول على تشييد هذ المشروع، قال، فتصريحات للصحافة، بللي اختار يصمم هذ الدار بشكل فني باش تنافس مجموعة من دور الأوبرا العالمية اللي كتستفرد بأشكال هندسية جمالية مختلفة، وعلى رأسها الدار المصرية المشهورة عربيا.

ومابقاش بزاف باش تتفتح دار الأوبرا المغربية اللي ممكن تتنظم فيها سهرات لفنانين مغاربة كلاسيكيين، كانوا قبل حياو سهرات فالدار المصرية، بحال حياة الإدريسي وعبدو الشريف وأحمد البيضاوي وفرقة “كورال رنين” وآخرون…