كود تطوان ///

البارح واليوم اسبانيا محتافلة بقواتها العمومية: البوليس ولاگوارديا سيڤيل والجيش بفرقه. سياسيون كيشيدو بيهم. اليمين المتطرف محتافل بيهم. قبل قليل على “الخامسة” سماوهم “ابطال سبتة”. جابو صورة ديال واحد من فرقة فالجيش كان بان فصورة هاز طفل عندو 6 سنين على كتافو فوق السور وشكروه ووراو صورة مشرقة لخدمتو وللفرقة اللي منها.

قبلو البارح “السادسة” جابت هاداك اللي من “لاكوارديا سيڤيل” اللي نقد رضيع كان غادي يغرق. دارو معاه حوار وسولوه وكبرو بيه وبالامن بزاف.

لكن البارح خرجات امنستي تقرير على ان قوات الأمن والجيش الصبليوني ماشي بهاد الحنية. ماشي بهاد الكرم. ماشي بهاد الصورة المشرقة. امنستي قالت باللي هاد القوات “تسببات” فأعمال عنف ضد أشخاص بالغين ومراهقين.

اخطر من هاد الشي قالت باللي بعض هاد القوات لاحت هاد الشباب فالبحر. واوضحت رجينيا ألفاريث٬ مسؤولة بمنظمة العفو الدولية٬ أن قيام القوات الإسبانية باستخدام العنف في وجه أشخاص بالغين ومراهقين أمر غير مقبول، ودعت السلطات الإسبانية إلى فتح تحقيق شامل وضمان مساءلة المتورطين في هذه الحوادث.

وكان الصحافي في “ايفي” محمد سيعلي نقل شهادات حية لمواطن سينغالي ما كيقدرش حتى يتحرك ولاحوه الصبليون فالحدود المغربية وسدو الحدود. هاد الشاب السينغالي هزو على كتفو مواطن ليه.

امنستي طبعا انتاقدات المغرب وقالت باللي بلادنا “تغامر بحياة مواطنيه” وكتستغلهم ” كبيادق في لعبة سياسية”.

المهم هاد التقرير ديال امنستي ما هدرت عليه الاعلام الاسباني بكاع تلاوينو وحتي اللي جبدو كان بشكل محتشم. المهم بالنسبة ليهم هو الاحتفال بوحدين واخا يكونو طلقو القرطاس على حراكة واخا لاحو وحدين فالبحر.