كود هناء ابو علي ///

هادي بدعة جديدة. تخربيقة جديدة. عامل إقليم سيدي إفني سميتو الحسن صدقي ولى كيشرف على انطلاقة تصوير اعمال تلفزويونية. واييه دارها وكتباتها “لاماب”. كتهدر على فيلم “ابي” للمخرج محمد الشريف الطريبق اللي بغى يصور فيلمو بمدينة سيدي إفني. عمالة الاقليم دارت بيان وقالت باللي هاد الشي “يأتي في إطار دعم العمل الفني والابداعي وبالنظر للدور الهام المنوط بالإعلام كرافعة أساسية لتحقيق التنمية المحلية”.

وباللي يهدف “في عمقه الترويج السياحي للإقليم عبر إبراز المؤهلات الطبيعية والموروث الثقافي”. دابا واش هادا فيلم اي ابداع ولا وصلة اشهارية لمدينة. حقاش فالبيان هدرو على “فعالية للتسويق السياحي مقارنة بطرق التسويق التقليدية” ودخلو فالسيناريو باش زادو “سيحاول منتجو هذا الفيلم القيام به عبر رحلة بحث البطلة عن أبيها حيث سيم اكتشاف وإبراز سحر وجمال الفضاء”.

دابا هاد الطربيق اللي بدا بافلام قصيرة وهو يزگلها فاول فيلم طويل على الطلبة فالجامعة٬ ولى كيدير بحال نعمان لحلو. كل مرة كيقصد مدينة ويدير عليها اغنية.

واش يقدر يصدق شي حد بعد ما تقال٬ تصريح الطربيق ل”لاماب” باش قال باللي “اختيار سيدي افني لتصوير هذا الفيلم تحكمه أيضا محددات درامية وجمالية لما تختزنه من طابعين اجتماعي ومعماري، متوسطي إيبيري، وتميزها بجغرافيا فاصلة بين شمال المغرب وجنوبه، هذا فضلا عن تواجدها على ضفاف المحيط الأطلسي الأمر الذي يتيح شروطا ملائمة للتصوير”.

دابا كيضحك علينا وصافي. التاريخ غادي يحتافظ بهاد الطربيق كاول مخرج مغربي يجيب عامل يعطي انطلاق الفيلم اي هو اللي قال “اكسيون”. وشفتو فين وصلنا