وفينكم يا الاسلاميين اللي طلعتو شعارات سياسية فالشارع وحرضتو المغاربة باش تحرجو الملكية بسباب التطبيع.. هاهي حماس بدات تعترف بالهزيمة وتنازلت على مبادئها: مستعدين نحطو السلاح بشرط تقبل اسرائيل بحل الدولتين
هناء ابو علي – كود /////
حصلت “كود” على نسبة المشاهدة اللي دارتها برامج القنوات المغربية فالاسبوع اللول من شهر رمضان وفق “ماروك ميتري”. هاد الارقام كتشمل الفترة من 7 الى 13 ماي وكتبين ان لمغاربة كيبقاو قدام التلفزة 5 سوايع و4 دقايق. هاد الشي كيفسر تراجع المنتوجية عند كثير منا. مقابلين غير التلفزيون.
هاد الارقام بينات ان “دوزيم” محيحة كيف فالمواسم السابقة. خلال اليوم دوزيم عندها 46.8 بالمائة من نسبة مشاهدة القنوات المغربية. متقدمة بزاف على “الاولى” اللي فالرتبة الثانية واللي حصتها ما كتفوتش 14.1 بالمائة وكاينين شي قنوات غير زايدات وصافي. باقي قنوات القطب العمومي كلها يالله كيجيبو 3.1 بالمائة فيما المغربية يالله كتجيب 1.6 بالمائة كنسبة مشاهدة.
لكن المهم فرمضان هو نسبة المشاهدة وقت الذروة اي ما بين السبعة وثلث والتسعود وثلث =وقت لفطور= فهاد النسبة دوزيم كتهرب بزاف علي الاولى. قناة عين السبع كتوصل نسبة مشاهدة 60.1 بالمائة و”الاولى” كدير 20 بالمائة و”المغربية” وقنوات القطب العمومي مجموعين يالله كيديرو 3 بالمائة.
تحييحة دوزيم كتبان فعدد المشاهدين لبرامجها. فاكثر البرامج مشاهدة كان هو “مشيتي فيها” اللي جمع الجمعة 10 ماي 12 مليون و569 الف مشاهد محققا 74 بالمائة من نسبة المشاهدة وجا من بعدو سلسلة “حي البهجة” اللي جاب الاحد 12 ماي 10 مليون و643 الف مشاهد محققا فديك الليلة اكثر من 66 بالمائة من نسبة المشاهدة ويلي هاد العملين كل من “ساميحي” و”زارتنا البركة” و”حديدان عند الفراعنة”. لقليل فهادو دار اكثر من 7 المليون.
ندوزو ل”الاولى” اللي كيتشاف فيها كثر وهادي مفاجأة هو هاداك العمل التافه ديال هشام العسري “همي اولاد عمي”. شافوه اكثر من 4 المليون ليلة الجمعة 10 ماي. تبعو “تكشيرة” و”نهار مبروك” و”دنيا دوارة” هادو دارو مابين 4 و3 مليون مشاهد.