نجوى المالحي-كود//
بزاف ديال المنتجين العالميين كيختارو المغرب باش يصورو الأفلام ديالهم لي كتحظى بنسب مشاهدة كبيرة بزاف. اخر فيلم لي غادي يصدر هاد الأيام على “نيتفلكس” هو “The Old Guard” لي تم تصوير جزء كبير منو في مراكش، ولعبات فيه دور البطولة الممثلة الجنوب افريقية تشارليز ثيرون.
البارح الاثنين حطات تشارليز تصاور على حسابها في انستكَرام لي فيه حوالي 6 مليون متابع ودارت اسم المغرب، والتصويرة حظات بتفاعل 200 ألف واحد، وكثر من 4 الاف متتبع كتب تعليق.
وكتشير المعلومات أن التصوير دام في المغرب جوج سيمانات، وشاركت فيه مجموعة كبيرة من أطقم العمل المحلية.
وتم تصوير مشاهد من الفيلم ديال ثيرون في العديد من معالم مدينة سبعة رجال، بحال فندق الفن، وساحة جامع الفنا، ومدينة تامنصورت، زيد عليهم عدد من القرى بحال بوخريص، حربيل، مركز قطارة، دوار تازولت، وواحد الفيلاج في منطقة الكيك في جبال الأطلس.