عفراء علوي محمدي- كود//

استندات الجمعية المغربية لأمراض المناعة الذاتية والجهازية على بيانات نشراتها الأكاديميات الوطنية للعلوم والهندسة والطب في الولايات المتحدة، كتقول بللي أنه من الممكن انتقال فيروس كورونا المستجد إلى الأشخاص عبر الهوا، وخا خبراء مغاربة قالو بللي انتقالو كيكون فقط عن طريق قطرات كبيرة التي تطرد من الأنف أو الفم  أثناء  السعال أو العطس.

وكتقول الجمعية، فبيان ليها حصلات “كود” على نسخة منو بللي التقرير نقلاتو الأكاديميات للحكومة الأمريكية ف1 أبريل، وكيقول باللي الفيروس كيمكن يطير فالهوا منين يخرج من الأشخاص المصابين، ومن المحتمل يخرج حتى إلى تنفسو هذ الاشخاص أو تكلمو، وماشي فقط عن طريق الرذاذ.

ومن خلال هذ الدراسات، كتشوف الجمعية بللي يمكن تكون إمكانية الإصابة بعدوى الفيروس عن طريق الهوا، غاتكون قليلة شوية، لكن ممكن تساعد فانتشارو بسرعة كبيرة، ومن المحتمل يكونو المصابين اللي ماعندهمش أعراض من الناس اللي كاتنشر الفيروس أكثر من لوخرين، وبلا مايعرفو.

من جهة اخرى، كتشوف الجمعية بللي الفيروس يقدر ينتقل بطرق أخرى، واستشهدات بتقارير لباحثين فجامعة نبراسكا اللي اكتشفو أجزاء من الشفرة الوراثية لكورونا في هواء الغرف فين تعزلو اللي مصابين بيه، و75 فالمية منو فالمراحيض وحواف النوافذ وإطارات السرير، وهذشي كيقدر يخلي واحد آخر يتصاب بالفيروس.

وكتقول الجمعية بللي الشينوا خداو نظرية انتقال الفيروس عبر الهواء، بل وجودو فكل مكان، على محمل الجد فالتوصيات ديالهم، وهذشي اللي خلا العلماء ديالهم يحثو كلشي يلبس الكمامات، باش ماينتقلش للناس الفيروس بأي طريقة أو وسيلة كانت.