كود هند لكلاوي ///
استقالة فيصل مكوار نائب رئيس الباطرونا البارح زادت مشاكل هاد الكونفدرالية ديال رجال الاعمال زمن الرئيس الحالي وزير الخارجية السابق صلاح الدين مزوار.
مكوار كان عندو دور كبير فوصولو لهاد المنصب بالاضافة الى الملياردير سعيد لعلج مهندس وضع واحد ماشي رجل اعمال على مؤسسة ديال رجال الاعمال.
وفق احد الاعضاء الفاعلين فهاد الكونفدرالية ل”كود” فان المشاكل فرئاسة مزوار ليها غادية تكثار. العضو اوضح ل”كود” “الباطرونا ما خداماش. والو عاطينها غير للدوران والسفر مع الاجتماعات اللي ما كتعطي والو” نقطة اخرى يضيفها المصدر ل”كود” ان “الكونفدرالية ولات بحال الوزارة”. انتقاد لتدبير مزوار ليها. كيسيرها بحال ايلى كيسير الوزارة.
نقطة اخيرة اضافها العضو ل”كود” وهو ان الباطرونا فهاد ليام ما مسوقاش للمنخرطين “حتى حد ما كيسول فيهم. كونفدرالية للدفاع عليهم ولات ما مسوقاش ليهم” هادي صعيبة بزاف. كاينين تجمعات مهنية كتعيش ما كتيعشو الباطرونا.
