كريم الصوفي – كود//
[email protected]

قال موقع “أوكي دياريو”، أن تاجر مخدرات مغربي عندو 27 عام اتصل بالحرس المدني الاسباني باش يبلغ عن الماريخوانا اللي تشفرات ليه. هاذ الواقعة طرات ف بادول (غرناطة) وسالات بفتح تحقيق معاه حول الوقائع اللي ذكرها خلال الشكاية الهاتفية الي قدم لمركز البوليس وعطاهم العنوان ديالو والهوية وجميع التفاصيل.

واضافت التقارير ذاتها، أن المتهم كيواجه دابا تهمة ارتكاب جريمة ضد الصحة العامة لإنتاج الماريجوانا والاتجار بها. وحسب روايته، فقد اقتحم ثلاثة رجال مقنعين منزله للاستيلاء على المخدرات، وبعد تفتيش الحرس المدني للمنزل، لقاوه مجهز شامبر خاصة لزراعة الحشيش بشكل مكثف وحجزو صندوق عامر ب 670 غرام من الماريجوانا.