الرئيسية > آش واقع > ارتباك فالبي جي دي. ضامن خسارة كبيرة فعدد من الجهات اللي مازال ما علنش اسماء المرشحين. صراع بين تيارات الحزب وتوقع يجي الرابع فجهة طنجة معقلو التاريخي وناسو فالشاون قررو يقاطعو الانتخابات كاع
29/07/2021 11:30 آش واقع

ارتباك فالبي جي دي. ضامن خسارة كبيرة فعدد من الجهات اللي مازال ما علنش اسماء المرشحين. صراع بين تيارات الحزب وتوقع يجي الرابع فجهة طنجة معقلو التاريخي وناسو فالشاون قررو يقاطعو الانتخابات كاع

ارتباك فالبي جي دي. ضامن خسارة كبيرة فعدد من الجهات اللي مازال ما علنش اسماء المرشحين. صراع بين تيارات الحزب وتوقع يجي الرابع فجهة طنجة معقلو التاريخي وناسو فالشاون قررو يقاطعو الانتخابات كاع

كود سعيد الشاوي طنجة ///

الأمانة العامة ديال البيجيدي اشتغلت خلال الأسابيع الماضية على تزكية المرشحين للبرلمان في دوائر عادية وما عندوش حظوظ حقيقية للفوز بمقاعد فيها. هاد الشي علاش علنو على اسماء المرشحين ف8 الجهات من اصل 12. هاد الجهات الربعة هي المهمة او كانت حاسمة ففوزهم بالانتخابات ف2011 و2016.

علاش؟ حقاش هي المعاقل الانتخابية الحقيقية ديال البيجيدي. واخا هاكا ما زال ما تمش الحسم الترشيح الرسمي فيها، وخاصة جهات الرباط سلا القنيطرة، والدار البيضاء الكبرى، وطنجة تطوان الحسيمة، وفاس مكناس… وهاد الجهات هي القوة الانتخابية الرئيسية ديال حزب الإسلاميين.

وفق مصادر من المصباح ل”كود” فان الحزب عندو صعوبات حقيقية للحسم فهاد الدوائر، بسبب الصراعات لي عرفاتها، ولي كتهدد بخسارة عدد من المقاعد المضمونة.

ووفق مصدر “كود” فالرباط كتعرف تجاذبات خطيرة بين صقور الحزب، والقنيطرة فيها صراع بين تيار عزيز الرباح وتيار المنسق الإقليمي الحرفاوي.
فيما فاس ومكناس فيهوم إشكالات بين قيادات البيجيدي، والحزب مهدد باش يعرف تراجع كبير أمام الأحرار والپام.

وطنجة الحسيمة٬ تضيف مصادر “كود”٬ فيها تراجع كبير ديال البيجيدي لي يقدر يخسر نصف المقاعد البرلمانية ديالو، خاصة في ظل الاستقالات اللي عرفاتها طنجة.

اكبر دليل على المشاكل اللي كيعرفها الحزب فهاد الجهة يقول مصدر ل”كود” هو ان ناسو قررو يقاطعو الانتخابات فالشاون. ما غادينش يديرو بيان ولكن قالو للحزب ايلى بغيتو ترشحو شي حد تقدمو وما تعولوش علينا.

كما ان الحزب تضيف مصادر “كود”٬ ما كاينش ليه وجود فالحسيمة.

فهاد الجهة: طنجة الحسيمة تطوان٬ حتى ناس الحزب اللي هدرات معاهم “كود” كيتوقعو يجيو فالرتبة 4 ورا الاحرار والبام والاستقلال. طبعا هادا نتيجة للقاسم الانتخابي اولا وللصراعات بين ناس الحزب ثانيا. البارح نشرات “كود” استقالة رئيس مقاطعة طنجة المدينة احد قادة الحزب التاريخيين فالجهة.

جهة اخرى كيحيحو فيها سابقا وهي جهة الدار البيضاء٬ فحتى هي كتيعش غموض كبير نتيجة التأخر فالحسم ديال الترشيحات، وقواعد الحزب ما زال مضاربة على المقاطعات لوائح البرلمان تشرح مصادر “كود”. وتضيف هاد المصادر ل”كود” ان صقور الحزب بعمالات وأقاليم الدار البيضاء كتحس باللي الأمانة العامة مترددة في الحسم في الخلافات لي ظهرات بين المنسقين الإقليميين والبرلمانيين ديال مقاطعات الفدا والصخور السوداء والحي المحمدي وسباتة وعين الشق، في حين أن سطات وبرشيد ما زال كتعاني من صراع بين البرلمانيين الحاليين ومسؤولي الحزب بالمنطقتين.

هاد الوضع غادي يخلي البيجيدي يدخل ضعيف للاستحقاقات الانتخابية، ويقنع بالمرتبة الثانية وطنيا في الانتخابات البرلمانية وراء الأحرار لي حسم الترشيحات ديالو على بكري وبدا فعليا فالعمل الميداني لتحقيق المرتبة الأولى. مع هاد الخلافات حتى الرتبة الثانية غادية تولي مهددة.

موضوعات أخرى

28/03/2024 11:00

إدانة المحاميين د الرابور “ديدي” مداهمة الفيديراليون : زادو فيه وهذا” فخ”

28/03/2024 10:30

وشوفو التلاميذ كيولاو.. تلميذ شرمل إداري بثانوية فسلا وشرك ليه وجهو وباقي داخل خارج للمدرسة وغليان وسط أسرة التعليم فالمدينة

28/03/2024 10:20

أزمة كليات الطب والصيدلة مزال غادية.. مجلس طلبة الطب بفاس: النضال ديالنا مستمر ومقاطعتنا المفتوحة قائمة

28/03/2024 10:00

تمويل مول “الشروق”. بوصوف باغي يخلع القضاء بالرسالة الملكية: غير خرج خبار التحقيق معاه نشر رسالة للملك فالفايسبوك وسبونوسوريزياها

28/03/2024 09:00

محكمة فالصبليون برأت المتهمين فقضية لكسيدة اللي ماتو فيها 8 ديال المغاربة ف اسبانيا عام 2008

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون