كود علي الصافي العيون ///

اهانة كبيرة للمغرب. احتقار ليه اللي وقع البارح فاسبانيا. البارح واحد يونيو 2021 تم الاستماع لابراهيم غالي زعيم البوليساريو من قبل قاضي اسباني بعد شكايات ضدو بالتعذيب والقتل والاغتصاب… هاد الشي كان فحدود العشرة ونص لحداش دالصباح. لكن وقع حدث غريب يخلي الواحد يسول اسئلة على هاد المحاكمة.

البارح مع الثمنية الصباح اي ساعات قبل هاد المثول٬ ناضت الجزائر رسلات طيارة خاصة تابعة للدولة ديالها ل”لوگرونيو” بجهة لاريوخا فالشمال باش ترجع ابراهيم غالي. هاد الشي قبل المثول. قبل ما ياخد القاضي القرار ديالو. قبل كلشي.

باش تدخل طيارة جزائرية تابعة للديبلوماسية خاصها ترخيص من وزارة الخارجية الاسبانية اي من الدولة الاسبانية. هاد الدولة عطاتها ترخيص ودخلات للمجال الجوي الاسباني ووصلات حتى لحدا ايبيزا عاد طلع القالب مع الحكومة الاسبانية. باش تنقد الموقف قررات ترجع الطيارة للجزائر.

عسكر الجزائر فرشهم باش رسلها فالصباح ماشي حتى يدوز اول استماع ويستناو قرار القاضي.

فقضية ارجاع الطيارة كان تناقض كبير فتفسيرات الحكومة الاسبانية وكولو كذوب. الناطقة الرسمية وزيرة المالية قالت ما فراسهاش. وزير النقل قال باللي كاين مشكلة فمطار لوگرونيو وباللي ما يمكنش يستقبل طيارات من هاد النوع وزاد كذب ودخل باللي ما كايناش الوقاية المدنية فهاد المطار وعليه ما سمحوش ليها تحط فيه. لكن صحف اسبانية فرشاتهم باش قالت باللي نفس المطار حطات فيه طيارة جابت فرقة من لاس بالماس بكانارياس يوم 30 ماي 2021 اي يومين قبل. وهاد الطيارة كبيرة بزاف على الطيارة الديبلوماسية الجزائرية.

هاد الشي كيخلي القراءات تمشي باللي ما كاينة لا عدالة لا والو فاسبانيا وباللي الحكومة كانت عارفة القرار وعطاتو للحكومة الجزائرية وباللي الاستماع والحضور الاعلامي وو كولو تمثيل فتمثيل. ثم القاضي قال باللي خاص عنوان لهاد المتهم. كيفاش يخرج من البلاد واش من عنوان دابا يقدر يتبعو القاضي الى بغاه غدا.

باش الجزائر فرشات مدريد تقرر ان شركة فرنسية تدخل على الخط وتم كراء طيارة من بوردو وهزات غالي ماشي من لوگرونيو باش ما توقعش الفرشة ولكن من بيكتوريا باقليم الباسك. جابت معاه شي 6 خراين وحطات فالجزائر فاولى ساعات هاد الصباح.

هنا واش فرانسا حتى هي داخلة فهاد الفيلم. علاش ختارو طيارة من هاد لبلاد وكاينة امكانية يكريو اللي بغاو من اسبانيا.