هاد الثماني ميلومترات طولا طريقها وعرة وفيها تلال صغيرة، ومن النظرة الأولى غادي يبانو ليك سيارات واقفين ما مسول فيهم حد لأنهم بلا وراق بلا والو وغالبيتهم مزورين، بالإضافة لكونها محطة أيضا لتغيير العملة وكتلقى فيها مغاربة وموريتانيين وحتى منحدرين من تندوف في بعض المرات ومهاجرين من دول جنوب الصحرا.
وبالنسبة لوضعها القانوني فملف الصحرا فهي تعد منطقة عازلة دارتها الأمم المتحدة كذلك فاش تافقو على توقيع اتفاقية اطلاق النار. بمعنى هاد المنطقة ما خاصش يكون فيها لا العسكر ولا قشالي ولا غيرو، فقط تبقى خاوية بحال صمام أمان من أي اشتباك بين المغرب وجبهة البوليساريو وعلى طول 8 كيلومتر.
هاد الكركرات من بعد توقيع اتفاق اطلاق النار بين الطرفين بقات ما ديال حد، فقط كيراقبوها عناصر “المينورسو” وكيشوفو شنو واقع فيها. ياك ما دار شي حد قاعدة عسكرية، ياكما فيها عسكر وكل مظاهر العسكرة أو التجييش.
الكَركرات بقات منطقة مغلقة حتى لسنة 2001 فاش فتحها المغرب باتفاق مع الأمم المتحدة، ودار فيها معبر تقدر تخرج منو نحو الأراضي الموريتانية، بمعنى خلق معبر لتيسير الحركة المدنية وأنشطتو التجارية والبوليساريو ما دارت حتى ردة فعل سكتات وخلات المعبر خدام.
بموجب هاد الاتفاق ديال وقف اطلاق النار فالكركرات ما خاصش يكون فيها معبر بتاتا لأنها مسدودة والمعابر لي مفتوحة بين المغرب والمنطقة العازلة محددة في أربعة فقط كيدوزو منها المينورسو باش يراقبو وقف اطلاق النار خلف الحظار الرملي، والكركرات ما كايناش فهاد الاتفاق. هادشي علاش شفنا هاد الروينة لي دابا والتصعيد.
الروينة ديال الكركرات كانت بدات مع رالي باريس دكار فسنة 2001 فاش هددت البوليساريو بقصفو اذا داز منو شي حد قبل ما تتراجع، ولكن الأمر خدا منعطفات كبيرة من بعد خاصة من بعد 2015 حتى ل 2016 فاش كان المغرب يدير تعبيد للطريق ولي عتابرتو البوليساريو خرق لاتفاق وقف اطلاق النار ووقفات تعبيد الطريق لي ما كملاتش من بعد ما تواجه الجانبان وجها لوجه على بعد 20 متر تقريبا “كود” كانت مشات لتم ودارت روبورتاجات وعاينت الحالة.
فهاد السنة الاخيرة البوليساربو حسات بتراجع أطروحتها من النزاع وقلبات على استراتيجية ترجع بيها للحياة، لذلك أطرات تابعين ليها وداتهوم للكركرات وخلاتهم يقطعو الطريق، خصوصا ان هاد الطريق ولات شريان للاقتصاد المغربي والافريقي والموريتاني.
هاد السدان كان معروف غادي يسالي باحتمالين، الأول إما ينساحبو المحتجين ويا إما تسالي بخرق اتفاق وقف اطلاق النار من جرف واخد من الجانبين وتنتهي القضية بالحرب. وهادشي لي واقع دابا اشتباكات بين الطرفين وتبادل لإطلاق النار.