كود كازا ///

ولات نكتة حسبان غادي للحج، نكتة عند الرجاويين، كين لتيقها وصحبها فعلا خبر صحيح، وكين لي قال وخا اتقيد حسبان وبغي امشي للحج ميقبلوهش.

الإشاعة ولات حديث الساعة داخل أوساط المحبين والمنخرطين بالرجاء، لدرجة أن بعض المنابر تيقوها ونشروها خبر، في حين هي مجرد إشاعة، لأن حسبان مناويش امشي للحج، خصوصا أنه كيوجد للجمع العام لباغي اعقداو في 19 من الشهر المقبل.

وحسب مصادر “كود” حسبان تلقى مكالمات بزاف ميسولوه واش بصح غادي للحج، ومني عجباتو القضية مبقاش اعطي لصحابو لكيتاصلو بيه راس الخيط، باغي اخلي الناس تالفين، بين لمصدق الخبر وبين لممصدقوش، وهادشي كيعجب بزاف الرئيس الرجاوي، لكيقلب ديما اكون محط اهتمام وسائل الإعلام، سواء بالصور ديالو أو الأخبار لكتروج عليه.

الحقيقة حسب مقربين من الرجاء ل”كود”، أن حسبان مغاديش للحج، ومغاديش اعقد الجمع العام في 6 شتنبر، ومغاديش استاجب للمطالب ديال المنخرطين المعارضين، وغادي ادير داكشي لبغا هو يعني الجمع العام في 19 شتنبر، والشروط لغادي اعلن عليها هو.