مصطفى الشاذلي – كود سبور//
إسرائيل منعات مشجعين رجاويين من الدخول إلى فلسطين لتشجيع فريقهم الرجاء البيضاوي أمام هلال القدس الفلسطيني اليوم الخميس فملعب رام الله، برسم إياب الدور32 لمسابقة كأس محمد السادس للأندية العربية.
27 رجاوي ترفضوا من الحدود وكانوا غادي يمشيو للحبس، لحقاش ما عندهومش التراخيص باش يدخلو لفلسطين.
وسلطات الأردن تساهلات مع المشجعين الرجاويبن باش دخلوا لأراضيها ونبهاتهم أن الدخول لإسرائيل غادي يكون شبه مستحيل بالنسبة ليهم بسبب القوانين الصارمة لي كتفرضها الدولة على كل واحد باغي يدخل لفلسطين.
المشجعون لقاو راسهم فموقف حرج، كانوا غادي يتحبسوا، قبل ما تنجح تدخلات في إعادتهم إلى الأردن من جديد.
وحسب مصادر “كود”، فإن السفارة المغربية بالأردن كان لها دور كبير فحل هاد الازمة، بعد ما رجعات 27 مشجع إلى الأردن وبيتاتهم فالأوطيل، قبل ما تعاود ترحلهم للمغرب.
