محمد سقراط-كود///
أي حكومة كتحتارم راسها وكتمثل الشعب بصح، فراه فحادثة بحال ديال إيجوكاك ضروري غادي ينتاقلو مسؤولين كبار لعين المكان ويوقفو على عملية الإنقاذ أو إستخراج الجثث، طبعا هوما ماغاديش يرجعوهم للحياة ولكن على الأقل غادي يبينو للمغاربة وللعالم أن المواطن المغربي عندو قيمة وماشي مجرد حشرة يكفي ستاتو في فايسبوك لنعيه، الكوارث الطبيعية كتوقع فالعالم كامل، ولكن في الدول لي عندها حكومات كتحتارم مواطنيها وفي خدمتهم، كنلقاو المسؤولين وسط الحدث، وكاين لي يوقف الكونجي ويوقف أي حاجة ويحضر حيت الواجب ديالو هاداك، طبعا الحضور ديالو راه غير رمزي وماغادي يغير من هول الكارثة والو، ولكن على الأقل كيبين القيمة ديال المواطن والواجب ديال الدولة إتجاهو.