محمد سقراط-كود///

في الرباط فاش كتدخل لشي بيسري ديال الشراب وأنت تتأمل فشنو باغي تشري كيجي عندك واحد السيد وكيبدى يشرح ليك ويقتارح عليك ويعطيك معلومات على كل قرعة، أو يقتارح عليك من خلال نتا شنو باغي وعلاش كتقلب، وطبعا الخيارات كتلقاها كثيرة ومن مختلف الدول الروج ديال الشيلي والطاليان والصبليون وفرنسا طبعا وكاليفورنيا، واخا تكون باغي تاخد غير قرعة بألف ريال كتعيش هاد التجربة ديال الإقتناء في ظروف إنسانية، في بداية الألفينات كانت تجربة شراء الشراب بحال شي مغامرة، أولا خاصك تجي عارف شنو باغي وفي الغالب القراعي المعروفين كانو كلهم عندهم ألقاب بالدارجة، الحوتة … مشيشات( بلاك أند وايت مصورين فيها كليبات ولكن سماوهم السكايرية مشيشات)… كوتشيا.. فراكة.. بولبادر..قنيبيلة، كتدخل للبيسري كتلقى كونطوار طويل وعالي جي عارف آش باغي طلب خلص شد، فاش كتخرج الى مكانش عندك المركوب فراه يقدر يطيرليك شي واحد الميكة من يديك، وحتى الى كان عندك قبل ماتركب كيوقفو عليك كرواتيا داك الساعة أرى من تم، تدوز في حقل ديال الألغام فسورينام وماتوصلش الشراب من البيسري للدار.

طنجة كانت من المدن القليلة لي كتقدى فيها في ظروف إنسانية، أولا لأن البيسري ديال الشراب هو بقال ديال الحومة أيضا، يعني كتوقف تقدى نتا الشراب وبنت صغيرة باكية دالصابون وواحد آخر كوميرة وفرماجة، مكتحسش براسك كتمارس الممنوع، حاليا المغرب غادي وكيتحضر والحضارة كتقاس بمدى السعادة وجودة العيش لي كيحسو بيها المواطنين، ومن بين أسباب جودة العيش والسعادة راه هي الطاسة وشربها وإقتنائها في ظروف إنسانية، المشكل عوض الفكرة تعمم في طنجة براسها بدات كتلاشى، وكتعوضها بيسريات على الطريقة الخرزية، واحد عشرة سبيسيال وجوج رابي جاكوب لوي في الكاغيط ديال الجورنال دير في الساكادو وهرب، تجربة إقتناء حق إنساني كتمر في ظروف لا إنسانية وبغاو شعب سوي عارف حقوقو وواجباتو وهو حتى جوج بيرات مايقدر يتقداهم على خاطرو بلا تبرزيط.

هاد اليوماين نايضة في بن حمد على ود رحمة الله وصلاتهم وغادي يتحل بيسري ديال الشراب عندهم، ومايبقاوش سكان بن حمد عيالات ورجال يغامرو بحياتهم ويتكرفصو ويشدو الطريق حتى للسطات باش يتقداو الشراب، عيالات ورجال خارجين ضد البيسري وبغاو المعامل عوضه، وهاهوما أصلا كانو المعامل راه خاص العمال في يفوجوا ماشي غير الخدمة والماكلة ولخرى بحال شي عبيد، وباش تعرف المغاربة كامونيين معندهمش مشكل مع الكراب والبزناز ولكن عندهم موشكيل مع البيسري ديال الشراب، عمرك تسمع شي وقفة داروها الناس ضد بزناز أو كراب أو شي واحد كيبيع الغبرة، كتلقاهم معروفين والصف على المرارة وتاواحد مايقدر يحل فمو، عوض سكان بنحمد يحمدو الله ويشكرو هاد المستثمر لي غادي يجيب ليهم الكاس حتى للفيلاج، عوض يبقاو ولادهم يطيرو على ماطر الشينوا أو يتعرضو لإبتزاز الطاكسيات والباراجات على ود قرعة ديال ستمية، وعوض يفرحو أنهم في الطريق الصحيح نحو الرباط أو على الأقل غير السطات، ناضو دارو مظاهرة حيت ماعارفينش المصلحة ديالهم فين كاينة، راه أي أم تبغي ولدها يغامر بحياتو على سي تسعين ويضرب كلمترات على ود قرعة ديال سبعطاش خمسطاش عوض يشريها من حدا الدار راها أم باغا المهلكة والموت لولدها أمهات وأباء بن حمد خاص يفرحو حيت البيسري غادي يحل عندهم في الفيلاج وغادي ينقص المصروف عليهم وعلى ولادهم وبناتهم وغادي يدخلو لمصاف المدن الكبيرة والمحترمة.