كود سبور//

تلقى النجم المغربي محمد أوناجم عرض من فريق الجيش الملكي لكرة القدم، باش يلتحق بالصفوف ديالو فالميركاتو الصيفي ويحمل القميص ديالو ابتداء من العام الجاي، حيث الفريق العسكري باغي يدعم المجموعة ديالو لي غتلعب على الواجهة المحلية والإفريقية.

مصادر مطلعة كشفت على أن محمد أوناجم ولي رجع للمغرب من بعدما انتهى العقد ديالو مع الزمالك المصري، عندو عرض من الجيش الملكي لي عندو رغبة فالتعاقد معه والاستفادة من الخدمات ديالو وهذا هو العرض الثاني لي عند أوناجم من الفرق ديال المغرب.

المصادر نفسها قالت على أن محمد أوناجم عندو عرض آخر من الفريق ديالو السابق الوداد الرياضي ولي حتى هو باغي يحصل على الخدمات ديال المهاجم الزئبقي، خصوصا وأوناجم عندو ذكريات جميلة مع ولاد الحمرا، ومن بينها التتويج بالعصبة فسنة 2017،  وملي رجع للفريق الأحمر من مصر العام الماضي كمعار من الزمالك وساهم فالبطولة لي ربح الوداد.

المنافسة دبا كبير ما بين الجيش الملكي والوداد الرياضي على محمد أوناجم لي كيفضل دابا يستمتع بالعطلة ديالو من بعدما رجع للمغرب، عاد باش يفكر فالعروض لي عندو فالبلاد وفالخارج، وبعدها يقرر شكون الفريق لي غيلعب ليه العام الجاي واش الجيش الملكي أو الوداد أو يرجع يحترف خارج لبلاد.