محمد سقراط-كود///

واش هذا هو أوميكرون لي سادين الحدود عليه وحارمين المغاربة من إحتفالات راس العام، وحارمين إقتصاد البلاد من الراواج وسادين السما و الأرض على ودو، وواخا سادين هاهو دخل ووصل حتى لعندي علما أنني إنسان قليل الإختلاط بالناس وخدمتي من الدار ووسيلة التنقل ديالي وهوايتي هي البيكالة، ومع ذلك هاني فيا أوميكرون لي ناكرة وزارة الصحة أنه دخل من برا واخا سادين الحدود، أعراض قليلة لي جاوني حيت ملقح جوج مرات، على خلاف المرة لي فاتت فاش جاني ديلتا هلكني ديال بصح وكنت باقي مملقح، ولكن عموما وعلى مايبدو لا من خلال الأقارب والصحاب والمعارف أن هاد أوميكرون ظريف وولد الناس وباغي غير يبقى مؤنس البشرية لي ملقحة طبعا، ورغم نكران وزارة الصحة بأنه دخل من برا وأن الوضع متحكم فيه فراه الدنيا مطلية بيه غير حيت الأعراض ديالو خفيفة عند بزاف وخصوصا الملقحين فراه حتى واحد ممخلوع من غير وزارة الصحة لي شادة بلاد على قدها كتعاني سنوات ورغم الفلوس لي تصرفات والناس لي تلقحو باغا وزارة الصحة خدامة بنفس الخطة وهي إغلاق الحدود، ملي فين مانسمعو شي متحور يتسدو الحدود علاش إذن كنلقحو.

الى ماحسش المواطن أنه بالتلقيح يمكن يحمي راسو ويربح حتى حريتو فما الجدوى من هاد الحملة، مادام أن الحدود كتسد على الملقح والغير ملقح، وكذلك القهاوي والبيران والحمامات والمطاعم والقاعات الرياضية والملاعب وزيد وزيد، كولشي مسدود على لي ملقح ولي لا، العالم كيحارب كورونا بعدة طرق وحاليا أقلهم هي الإغلاق وكاين دول عمرها سدات كاع ومع ذلك مشات أموروها بيخير، وحنا أكثر من نصف الشعب ملقح مرة وجوج ومع ذلك مكاين غير السدان، واش وزارة الصحة أصبحت فاشلة في تقدير الموقف والإجرائات المنطقية واللازمة لمجابهته حتى لهاد الدرجة.

أوميكرون لي سادة الحكومة البلاد بسبابو راه كولشي مطلي بيه أنا نيت أعراضو خفيفة خصوصا للملقحين ولي هوما أغلب المغاربة إذن علاش سادة الحكومة الحدود واش هذا كلو خوف على صحة المغاربة أو غير كلاخ وتقساح الراس، حيت لا يعقل أن دول العالم لي عندهم الحالات بمية ألف وحالين والناس كتنقل بكل حرية وخصوصا الملقحين، بهاد القرارات ديال الحكومة راه كتوصل للمغاربة أن التلقيح معندو علاقة بحرية التنقل والراواج الاقتصادي، راه غير وزارة الصحة مافيها لي يعمرليها الإنعاش، حيت راه لا يعقل أن في كل مرة الحل هو السدان وديما على الملقح والغير ملقح.