كود الرباط//

الشيشا فالمغرب، فوضعية “اللاقانون” بحيث مزال ماكاينش قانون كيمنعها ولا كينظم شروطها، وكتلقا مدن فيها ومدن مافيهاش.

مثلا فالعاصمة الرباط، مكاينينش مقاهي الشيشا أو بلايص ديالها، فالمقابل سلا ولا الهرهورة فيها وكيتم الترخيص ليهم. ولكن الغريب هو ان الرباط لوطيل الوحيد لي داير الشيشا هو سوفيتيل.

فالوقت لي الشيشا ممنوعة ومكتعطاش التراخيص ليها للمستثمرين، المكان الوحيد لي داير الشيشا فالرباط مثلا هو اوطيل سوفيتيل. هنا كيتطرح سؤال :”واش عندو ترخيص؟”، طبعا يلا كان الجواب بنعم راه فضيحة كبيرة حيث كيفاش سوفيتيل هو الوحيد لي داير الشيشا فالعاصمة والباقي لا، ويلا كان الجواب لا، فراه فضيحة اوطيل قدو قداش وكيستقبل ضيوف المملكة من سفراء ودبلوماسيين ومسؤولين كبار، كيخالف القانون.

القانون فالمغرب لا يمنع “الشيشا” ولكن الترخيص لهاد النوع من الانشطة كيدوز عن طريق السلطات الولائية، مع العلم أن مادة “المعسل” كتدخل عن طريق الجمارك بشكل قانوني.

يشار بلي الفريق الحركي بمجلس النواب، قدم مقترح قانون كيقضي بمنع استهلاك الشيشة والسجارة الإلكترونية في بعض الأماكن، كما حدد عقوبات في حق المخالفين كتتراوح بين الغرامة من 100 و300 درهم لكل من دخنها في الأماكن الممنوعة، كما تصل أيضا إلى ما بين 1000 و2000 درهم لكل من باع الشيشة أو السجارة الإلكترونية لقاصر أو مكنه منه.

وفحلقة سابقة من برنامج 45 دقيقة، أوضح البروفيسور هشام عفيف، أن الشيشا كتسبب ف40 نوع من السرطان والسرطان القاتل، والأمراض المزمنة بحال ضعف التنفس، والتسبب في أكياس الرئة ما يجعل عملها يضعف، وأمراض مزمنة للقلب والشرايين (سكتة قلبية، جلطة دماغ، قطع أطراف)..”.

وأضاف عفيف عن خطر الشيشة وعن دخان الگارو، “أن ساعة من تعاطي الشيشة يعادل جوج باكيات ديال گارو وقد يصل إلى ما يعادل 100 سيجارة أي 5 باكيات”.

يشار ان الصور من صفحة “so lounge rabat” لي هي بواط كاينا فسوفيتيل.