كود الرباط//

تحولت جلسة مساءلة الوزراء بمجلس النواب، يوم الاثنين 29 ماي الجاري، إلى بوليميك سياسي بين الحركة الشعبية والأصالة والمعاصرة، بعدما منع رئيس الجلسة محمد أوزين، البرلمانية البامية نجوى كوكوس تكمل هضرتها فاش قالت بلي خاص اللجوء للقضاء بخصوص اتهامات وزير التعليم العالي عبد اللطيف ميراوي بمحاباة مقربين منه ومنحهم تراخيص لبناء مؤسسات تعليمية خاصة.

ميراوي دافع على البرلمانية كوكوس ورد على أوزين بطريقتو، فاش جبد تدبير الحكومات السابقة للتعليم العالي، وقصد مباشرة سعيد أمزازي، الوزير السابق والقيادي فالحركة الشعبية.

ميراوي قال بأنه “ولد الدار وخدم فالجامعة سنوات وعارف الصغيرة والكبيرة، ومتخرجونيش من السياق علاش جيت، عندنا تحديات ديال 10 سنين ديال روطار و10 سنين متكلفناش بالذكاء الاصطناعي، والرقمنة درناها فمراكش والحكومة مدرتهاش”.

ميراوي كيدق مباشرة على أمزازي هو لي كان وزير التعليم العالي، فالوقت لي ميراوي كان رئيس جامعة القاضي عياض.

فهاد الجلسة، أوزين خاطب البرلمانية كوكوس بطريقة فيها تحامل كبير ضد المرأة حيثاش هي حاملة فقط، وقاليها: “حاولي على صحتك.. أنا كنبهك”، مضيفا: “هذا تشويش كاديري على الجلسة وكلامك خارج الإطار وعطيو شويا الوقار لهاد المؤسسة وباركا من هاد المستوى المنحط”.

وزاد أوزين قال لكوكوس: “غير كاضيعي الوقت.. حاولي على صحتك..”.