الرئيسية > آراء > أنقذوا أسرة ومستخدمي غلام أبو النعيم من الغرق في المعمل السري ديال أملو لي دايرو في الضراركة
04/03/2021 15:00 آراء

أنقذوا أسرة ومستخدمي غلام أبو النعيم من الغرق في المعمل السري ديال أملو لي دايرو في الضراركة

أنقذوا أسرة ومستخدمي غلام أبو النعيم من الغرق في المعمل السري ديال أملو لي دايرو في الضراركة

محمد سقراط-كود///

السيمانة الجاية كاين واحد المنخفض جوي جاي للمغرب، وغادي تكون شتا والرعدة ويقدر يوقعو الفيضانات في بعض المدن، لذا ومن باب الإنسانية وأحب لغيرك ما تحب لنفسك، فراه خاص الدولة تتدخل وتنقذ الأسرة ومستخدمي غلام أبو النعيم فداك المعمل السري لي عندو في الضراركة، فاجعة طنجة بينات أنه راه كاع المعامل السرية لي مافيهاش شروط السلامة يقدرو يوقعوا فيها كوارث لا قدر الله، وفاللخر غادي يبدى كولشي يلوم الدولة والمقدم والقايد وأمانديس ديال أيت ملول، بينما يمكن تفادي الكارثة على بكري ويمشيو المسؤولين ديال المنطقة ويشوفو داك المعمل السري لي داير، واش فيه شروط السلامة وواش المنتوج ديالو مريكل مافيه حتى موشكيل، ويراجعو معاه الدخل ديالو، حيت لا يعقل واحد كيبيع كلام الله في يوتوب لي طالع عليه فابور، ويدير شركة مقرها في العيون مامخدم فيها حتى واحد، بينما المعمل فين كيقاد المنتوج ديالو كاين في الضراركة، كولشي باغي يطلعو فابور، وحتى ريال مايمشي للدولة وفي النفس الوقت يضل ينبح عليها ديري لينا فعلي لينا طلقي لينا أبو النعيم.

المغرب يالله خرج من المنطقة الرمادية ودخل للمنطقة الخضراء وبعد من أنه يتعتابر جنة ضريبية، ولكن للأسف غلام أبو النعيم باغي يردنا للمنطقة السوداء بهاد الإحتيال الضريبي لي داير، مادام أن الشركة ديالو مقيدة في العيون باش يتعفى من الضريبة ولكن في نفس الوقت مامخدمة حتى حد في العيون وممحركاش العجلة في المدينة لي مسجلة فيها، ولي الهدف أصلا من تخفيض الضرائب فيها هو المساعدة على تحريك عجلة الإقتصاد في المنطقة، ولكن للأسف غلام أبو النعيم يكهمك بقال الله والرسول والصدق والإخلاص وهو داير تخلويضة باش مايخلصش الضريبة والعجلة لي كيعرف يدور هي ديال طوموبيلتو بسرعة مية وخمسين في الساعة وهو شاد التيليفون في سلوك انتحاري إجرامي باغي يقتل راسو ويقتل لي معاه، ضاربا بعرض الحائط النصائح لي كاتبينها صحاب الكاميوات ديال لا تسرع يا أبي أمي ستتزوج غيرك.

هاد الدعاة الجدد مكاينش فيهم لي باغي يديك معاه للجنة غير هاكاك فابور، بنادم يعرض عليك جوج أيات ويقرى الحمدو، ويعاودليك كيفاش الرسول مات ودرعه مرهونة، ويعطيك درس في الصدق والأمانة والقناعة ويبدى يعاودليك على عمر كيدور بالكربة ديال لما في الأسواق، وغير تسهى معاه يبدى يبيع ليك أملو وزيت أركان، والعشوب لعلاج القذف السريع، وغي يشوفك سهيتي يبغي يرقيك( داك الساعة هرب)، والى لقاك زوفري يبغي يلصقليك شي أخت مات راجلها في العراق باش تدي الآجر وتصون عرض زوجة شهيد، هاكا تخرج من عندهم طويل مستحيل، وطبعا الغلام راه على هاد الشاكلة غير هو مبلي بأنه ياكل رزق الدولة، وعندو منتوج كيبيعو في نفس الوقت ديما يدعو لمقاطعة أي منتوج آخر.

موضوعات أخرى

19/03/2024 10:00

تيار كازا فالبام داير روينة فالأغلبية… صديق سعيد الناصري بغا رئاسة مجلس النواب: واش هادي مناورة من المنصوري باش تفاوض على التعديل الحكومي ولا انقلاب جديد داخل التحالف الحكومي ولا باش يبلوكيو مدونة الأخلاق لي غادي تحيد مناصب للبرلمانيين ديالهم لي عندهم متابعات فالمحاكم

19/03/2024 09:45

قطاع الخدمات مزال كيحتل الصدارة فالتشغيل: مخدّم كثر من 5 مليون واحد من السكان النشيطين المشتغلين ومتبوع بقطاع الفلاحة والغابات والصيد

19/03/2024 09:30

عدد السكان اللي بالغين لسن النشاط (15 عام والفوق) فات فبلادنا 27 مليون شخص.. مندوبية التخطيط: 63,5 فالمية ساكنين فالوسط الحضري

19/03/2024 08:00

بن عبو لـ”كود”: موجة حر استثنائية فبلادنا وهاد السيناريو المناخي كيزيد تطرفا عام بعد عام وهادشي يؤكد أن الصيف الجاي غادي يكون حار وجاف وصعيب